Dogana e Kosovës në pikën kufitare Jarinjë ka parandaluar dy raste kontrabande në hyrje të territorit të Kosovës.
Gjatë kontrollit të një automjeti, të drejtuar nga një shtetas i Serbisë, Dogana ka sekuestruar 300 gram argjend të padeklaruar.
“Gjatë një kontrolli të detajuar mbi një automjet të udhëtarëve, i drejtuar nga një shtetas i Serbisë, zyrtarët doganorë zbuluan dhe sekuestruan rreth 300 gram argjend të padeklaruar. Malli ishte fshehur me qëllim të shmangies së detyrimeve doganore dhe futjes ilegale në tregun e Kosovës”, thuhet në njoftimin e Doganës.
Kurse në rastin tjetër, gjatë kontrollit, zyrtarët doganorë kanë zbuluar sasi të konsiderueshme produktesh të qumështit.
“Rasti i dytë: Në një rast tjetër, gjatë kontrollit të një automjeti tjetër, zyrtarët doganorë zbuluan sasi të konsiderueshme produktesh të qumështit, të cilat po tentohej të kontrabandoheshin pa dokumentacionin e nevojshëm shoqërues dhe pa respektuar rregullat e importit të produkteve me prejardhje shtazore”, thuhet ndër të tjera./teve1.info/
