Dogana e Kosovës ka zbuluar një sasi të cigareve elektronike të padeklaruara në Merdarë, në një autobus me udhëtarë i cili po udhëtonte nga Gjermania për në Kosovë, raporton teve1.info
Sipas komunikatës së Doganës, pas kontrollit të detajuar të autobusit, është gjetur sasi e cigareve në fund të autobusit dhe nën karrigen e mbuluar me valixhe, derisa shoferi e ka pranuar se malli i takon atij.
Malli i padeklaruar është konfiskuar derisa veprimet tjera doganore vazhdojnë sipas ligjeve në fuqi.
“Në pyetjen e oficerëve doganorë se a kishte diçka për të deklaruar, shoferi është përgjigjur se ka sasi minimale. Oficerët doganorë kanë kërkuar hapjen e të gjitha bagazheve, derisa drejtuesi i mjetit ka deklaruar se bagazhet në pjesën e majtë të autobusit nuk hapen. Oficeret Doganore së bashku me Oficerët e Policisë kanë hapur bagazhet, ku janë gjetur sasi prej 17,290 pako cigaret elektronike të shijeve të ndryshme, së bashku me 10,000 thithje (puffs) në sasi prej 20 ml secila, fillimisht në pjesën e majtë të bagazhit. Pas kësaj, autobusi është selektuar për kontroll të vijës së dytë, respektivisht për kontroll detal. Kontrolli ka rezultuar me gjetjen edhe të një sasie të konsiderueshme të cigareve elektronike në fund të autobusit dhe nën karrigen e mbuluar me valixhe dhe gjësende të udhëtarëve. Drejtuesi i autobusit ka pranuar verbalisht se malli i takon atij. Tërë sasia është konfiskuar derisa veprimet në lidhje me këtë rast do të vazhdojnë në përputhje me procedurat dhe rregulloret relevante të doganës”, thuhet në komunikatë.
