Në kuadër të projektit për Menaxhimin e Financave Publike, i financuar nga BE dhe menaxhuar nga GIZ, Dogana e Kosovës ka zbatuar disa nisma të përkrahura nga projekti për të reformuar organizatën me vizionin e krijimit të konceptit të organizatës së orientuar në shërbim ndaj publikut dhe bizneseve, kolektivisht referuar si shërbim ndaj klientit.
Dogana e Kosovës, e udhëhequr nga drejtori i përgjithshëm Llugaliu me bashkëpunëtorë dhe udhëheqësi i projektit Boris Petkov, kanë zhvilluar një takim me homologët nga Bordi i Tatimeve dhe Doganave i Estonisë. Takimi është hapur nga zëvendës drejtoresha për Dogana Ursula Riimaa, për të vijuar me prezantimin nga drejtori i përgjithshëm Llugaliu.
Agjenda mbuloi një gamë të gjerë temash thelbësore, duke përfshirë prezantime të përgjithshme të organizatave doganore në të dy vendet, planifikimin operacional dhe afarist të doganave, sfidat e burimeve njerëzore dhe diskutimet mbi iniciativat dhe programet e ndërtimit të kapaciteteve.
Takimi u thellua gjithashtu në proceset e modernizimit, duke shfaqur trendët më të fundit në modernizimin e doganave në Estoni, studimet e rasteve dhe praktikat më të mira. Gjithashtu, sesioni theksoi rolin vendimtar të zgjidhjeve të IT në dogana, duke theksuar rëndësinë e tyre në zbatimin e tregtisë elektronike, digjitalizimin dhe automatizimin.
Pjesëmarrësit eksploruan gjithashtu çështje me rëndësi të sigurisë, të tilla si zbatimi i sanksioneve ndaj Rusisë dhe një qasje e orientuar drejt shërbimeve ndaj proceseve doganore.
Nga diskutimet u arrit të mësohen njohuri të vlefshme për treguesit kryesorë të performancës (TKP) dhe lidhjen e tyre me sistemet, si dhe efektivitetin e performancës doganore në nivel të BE-së. Diskutimet u zhvilluan gjithashtu rreth sistemeve kryesore dhe bazave të të dhënave të përdorura për gjurmimin e indikatorëve të performancës.
Një vizitë në Qendrën e brifingut e-Estonia pasuroi të kuptuarit e qasjeve novatore të Estonisë ndaj digjitalizimit të shërbimeve publike. Sipas agjendës së dakorduar, delegacioni nga Dogana e Kosovës dhe udhëheqësi i projektit Petkov, vizituan vendkalimin kufitar Narva me Rusinë, për të parë më shumë nga praktika dhe infrastrukturën e automatizimit të vendkalimeve kufitare.
Dogana e Kosovës dhe Bordi i Tatimeve dhe Doganave të Estonisë mbeten të përkushtuara për të nxitur bashkëpunimin, për të shkëmbyer praktikat më të mira dhe për të vazhduar zhvillimin e operacioneve të tyre doganore në kontekstin e Bashkimit Evropian, thuhet në një komunikatë për media.
