Organizata “Demokracia në Veprim” ka reaguar ashpër pas vendimit të Komisionit Qendror të Zgjedhjeve për të mos certifikuar kandidatët e Listës Serbe, duke theksuar se ky vendim është marrë pavarësisht faktit që kandidatët kanë kaluar verifikimet e institucioneve kompetente.
Në komunikatën e saj, DnV shpreh shqetësimin se procesi i certifikimit është procedural dhe i qartë në Ligjin për Zgjedhjet e Përgjithshme, ndërsa vendimmarrja e KQZ-së nuk duhet të bazohet në interpretime politike. Sipas organizatës, vendimi përfaqëson një devijim të radhës nga praktikat e konsoliduara zgjedhore dhe nga vendimet e mëparshme të PZAP-së dhe Gjykatës Supreme.
“Përvoja ka treguar se vendime të tilla brenda pak ditësh zakonisht anulohen ose ndryshohen nga instancat e larta të ankesave, duke krijuar vonesa të panevojshme dhe duke minuar besimin në administrimin zgjedhor,” thuhet në reagim.
DnV thekson se kompetencën ligjore për verifikimin e kandidatëve e ka vetëm Zyra për Regjistrim, Certifikim dhe Kontroll Financiar të subjekteve politike, e cila më pas i rekomandon KQZ-së miratimin ose refuzimin e certifikimit. “Kompetenca e KQZ-së është vetëm formale për ta miratuar rekomandimin profesional të Zyrës,” nënvizon organizata, duke shtuar se kandidaturat në fjalë kanë kaluar filtrat ligjorë sipas neneve 27 dhe 30 të Ligjit për Zgjedhjet e Përgjithshme.
Në fund, DnV u bën thirrje anëtarëve të KQZ-së që të marrin vendime profesionale, të pavarura dhe në pajtim të plotë me ligjin, duke shmangur abstenimet apo vendime që mund të cenojnë integritetin e procesit zgjedhor.
