Fahri Fazliu i ka kërkuar babit të tij, Fadil Fazliut që të qëndrojë i fortë, pasi i njëjti është nisur për në Hagë.
Ai tha se Fadili duhet që të qëndrojë i fortë ashtu siç kishte qëndruar kur forcat serbe ia kishin vrarë të dy vëllezërit dëshmorë.
“Mirëmëngjesi bablok jem a je çu a ke pushu? Qëndro i fortë siç dite me qëndru i fortë e stoik edhe kur t’i vrau Serbia dy vëllezërit e tu, Heronjtë e Kombit, Fahri e Bahri Fazliu. Liri të shpejtë për gjithë çlirimtarët!”, ka shkruar ai.
Ish-kryetari i Malishevës, Isni Kilaj, ish-shefi i AKI-së, Bashkim Smakaj dhe Fadil Fazliu janë nisur për në Hagë.
Kështu ka bërë të ditur ekipi i Tëvë1 i cili ka qëndruar para zyrave të EULEX-it.
Të njëjtit janë nisur me vetura të EULEX-it të përcjelluara nga një ambulancë.
Ndryshe, që të tre ata u arrestuan mëngjesin e së enjtes me urdhër të Gjykatës Speciale.
ZPS-ja ka njoftuar se arrestimi ka të bëjë me dyshimet për vepra penale kundër administrimit të drejtësisë.
“Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, thuhet në njoftimin e Speciales.
