Një e martë me “mori” lëvizje të trajnerëve në futbollin kosovar. Prishtina, pasi fitoi Kupën e Kosovës i ka besuar “timonin” edhe për edicionin e ri trajnerit Debatik Curri. Curri e mori ekipin kryeqytetas në një situatë të vështirë me çka në fund u shpërblye me trofeun e Kupës.
Ndonëse Prishtina nuk është licencuar nga FFK dhe shkalla e dytë, por bardhekaltërit tani shpresat i kanë të Këshilli i Arbitrazhit Sportiv të KOK-ut për licencim.
Curri me të marrë drejtimin është shprehur se është nder që do të udhëheq klubin kryqeytetas, por premton se do ta ndjekë edhe rrugën e lavdisë.
“Kjo më jep përgjegjësi që të vazhdoj t’i ushtroj detyrat e mia të plota, që këto suksese t’i përsëris edhe në edicionin e ri. Objektivat e skuadrës janë të qarta.Jam i bindur se do të vazhdojë rrugën e lavdishme të një klubi si Prishtina”, ka thënë Curri.
Debatik Curri ishte pasues i Ismet Munishit i cili shkarkua në muajin mars, mirëpo tani Munishi ka një mision më ndryshe.
48 vjeçari ka nënshkruar kontratë dy vjeçare me Ferizajn dhe për mision ka ta kthej klubin në Superligë.
Munishi në prezantimin e tij është shprehur se përveç Superligës, në projektin e tyre është ta prekin edhe Evropën.
“Pavarësisht se do të garojë në Ligën e Parë, jam i bindur se Ferizaj do të funksionojë me logjikën e një klubi kampion të Superligës. Projekti është shumë serioz. Ne synojmë jo vetëm Superligën, por edhe Evropën në një periudhë të afërt”, ka thënë Munishi.
Kurse ekipet që i inkuadruan në Superligë Feronikeli ‘74 dhe Liria janë ndarë me trajnerët.
Begolli në njoftimin e tij pavarësisht se i është ofruar mundësia e vazhdimit ai ka vendosur që të mos jetë pjesë e skuadrës industrialiste. Ndërkohë, Liria ka ndërprerë bashkëpunimin dy vjeçar me Xhengiz Rexhepin.
