Sekretari i Zyrës ndërlidhëse të Kosovës në Serbi, Fatmir Haxholli, po pretendon se Serbia ia ka ndalur së ofruari sigurinë fizike për të si diplomat. Ky shqetësim i ngritur nga ana e tij po cilësohet si hap i duhur, në mënyrë Kosova në bashkëpunim me faktorin ndërkombëtar të merr masa për sigurinë e tij në Beograd.
Ditë më parë, sekretari i Zyres ndërlidhëse të Kosovës në Serbi, Fatmir Haxholli bëri të ditur si qëndron siguria e tij në Beograd.
Përmes një statusi në rrjete sociale, ai ka listuar disa fakte ku pretendon se ka kryer shkelje Serbia.
“Serbia ka ndaluar së ofruari siguri fizike 24/7 për mua si zyrtar/diplomat, dhe poashtu nuk ofron as siguri mobile. Pavarësisht ankesave dhe kërkesave kjo praktikë po vazhdon. Çfardo që mund të më ndodh gjatë shërbimit tim në Serbi , mes tjerash është përgjegjësi e drejtëpërdejtë e Serbisë! Për më shumë, kjo krijon një precedent të rrezikshëm, andaj më duhet ta them se ndjej, se tani e tutje se nuk jam i mbrojtur as i mbuluar nga Marrëveshja e Brukselit si instrument ndërkombëtar”, tha Sekretari i Zyrës ndërlidhëse të Kosovës në Serbi, Fatmir Haxholli.
Adresimin e tij në opinionin publik po e arsyeton politologu, Fidan Ukaj.
Ndër të tjera ai thekson se institucionet kosovare duhet të marrin masa.
“Ky shqetësim i ngritur nga Z. Haxholli e rrezikon punën dhe aktivitetin e Zyres Ndërlidhëse, më konkretisht të tij. Mendoj se një shqetësim i tillë duhet të mirret me mjaftë seriozitet nga ana e institucioneve të Kosovës dhe ky shqetësim të adresohet në Burksel tek partnerët dhe garantuesit e marrëveshjeve në mes të Kosovës dhe Serbisë. Rrezikimi i jetës së zyrtarëve, dhe zyres ndërlidhëse në Beograd po ashtu trajtimi joadekuat sipas këtyre marrëveshjeve e atakon drejtpërdrejt punën e këtyre zyrtarëve po ashtu e rrezikon edhe jetën e tyre”, tha politologu, Fidan Ukaj.
Zyra Ndërlidhëse e Kosovës në Serbi është themeluar me Marrëveshjen e Brukselit, të arritur në mes Kosovës dhe Serbisë, me ndërmjetësim të Bashkimit Evropian.
Përgjegjësi parësore e Zyrës Ndërlidhëse të Kosovës në Serbi është përcjellja e çështjeve që kanë të bëjnë me normalizimin e marrëdhënieve dhe adresimi i të gjitha problemeve që mund të paraqiten në baza ditore.
