Kosova po përjeton krizë të thellë institucionale.
Të zgjedhurit e popullit nuk po arrijnë ta gjejnë gjuhët e përbashkët për krijimin e institucioneve të reja.
Si pasojë e këtyre zhvillimeve nuk përjashtohet mundësia që të ketë edhe zgjedhje të reja.
Diplomati britanik, Timothy Less, vlerëson se kjo krizë po e dëmton Kosovën në aspektin politik.
“Kosovës i nevojitet një qeveri funksionale që mund të marrë vendime, dhe çdo gjë më pak se kaq është e dëmshme – sidomos në një moment kur ajo përballet me sfida në shumë fronte, nga ekonomia e deri te marrëdhëniet e tendosura me BE-në dhe SHBA-në. Në vend të kësaj, Kosova është e ndarë dhe pa udhëheqje, gjë që qartësisht e dobëson aftësinë e saj për të mbrojtur dhe promovuar interesat e saj, si brenda vendit ashtu edhe ndërkombëtarisht. Zgjidhja më e mirë, siç thashë, do të ishte një kompromis në të cilin një ose më shumë nga partitë opozitare e pranojnë të drejtën demokratike të Vetëvendosjes për të formuar qeverinë dhe bashkëpunojnë me të për ta bërë këtë, dhe VV e pranon të drejtën e opozitës për të qenë pjesë e asaj qeverie. Por nëse kjo do të ndodhë, mbetet për t’u parë. Unë dyshoj se Kosova po shkon drejt zgjedhjeve të reja – nëse jo menjëherë, atëherë në një të ardhme të afërt”, deklaron ai.
Less konsideron se është e domosdoshme që Lëvizja Vetëvendosje të ndryshoj qasje në raport me partitë e tjera.
Ai thotë se është në interesin e Kosovës që Vetëvendosje si parti fituese të jetë më bashkëpunuese me partitë opozitare.
“Detyrimi i parë i përfaqësuesve të zgjedhur është të punojnë së bashku në interes të qytetarëve që i kanë zgjedhur, dhe jo të konkurrojnë për pushtet mes tyre në dëm të popullit. Nga ana e tyre, partitë më të vogla duhet të pranojnë se Vetëvendosje i ka fituar zgjedhjet dhe këtë e ka bërë me një përqindje shumë të lartë të votave. Nëse e respektojnë vullnetin e popullit, ato duhet të jenë të gatshme të hyjnë në negociata për formimin e një qeverie ku Vetëvendosje luan rolin udhëheqës, në vend që të përpiqen ta përjashtojnë atë nga qeverisja. Kjo nuk do të thotë që duhet të dorëzohen ndaj çdo kërkese të Vetëvendosjes: ajo nuk ka shumicë, ndaj ekziston mundësia që partitë opozitare të paraqesin kërkesat e tyre dhe të sigurohen që qeveria e re i përfshin ato. Çdo alternativë tjetër, qoftë një koalicion i dobët i të gjithëve përveç Vetëvendosjes, apo vazhdimi i bllokadës aktuale politike, është një shpërfillje ndaj votuesve të cilët, mbi të gjitha, duan një qeveri funksionale. Nga ana e saj, VV duhet të jetë e gatshme të respektojë zgjedhjen e popullit dhe të punojë me partitë e tjera politike. Mund të ketë një vështrim negativ ndaj partive të tjera, por edhe ato kanë një mandat demokratik dhe interesat e vendit varen nga gatishmëria e Vetëvendosjes për ta pranuar këtë”, thotë Less.
Partnerët ndërkombëtarë të Kosovës kanë kërkuar që sa më shpejtë të krijohen institucionet e reja./teve1.info/
