U mblodhën në një vend dhe po rrëfejnë dhimbjet dhe mallin që kanë për më të dashurit e tyre.
Familjarët e personave të zhdukur, shqiptarë, serbë nga komunitetet e tjera po kërkojnë një përgjigje nga institucionet e Kosovës dhe Serbisë, për fatin e familjarëve të tyre të cilët u zhdukën me dhunë gjatë luftës së fundit në Kosovë.
Isuf Zogu nga fshati Komoran akoma nuk di asgjë për fatin e vëllait të tij i cili është i zhdukur që nga viti 1999.
“Duke u kthyer në shtëpi ai ka rënë në prit nga forcat ushtarake serbe. Të nesërmen në mbrëmje na erdhi lajmi që vëllai nuk është kthyer. Ai gjatë asaj kohe ka qenë i paarmatosur”, tha Zogu.
Kurse, Budimir Maslar nga fshati Tërgovishtë e ka të zhdukur motrën.
“Fatin e saj se çka ka ndodhur, si ka ndodhur, nuk e di. Një fqinj imi e ka parë në mbrëmje, thotë se me 16 a 17 qershor kur më është djegur shtëpia e ka parë motrën time, por që nuk e di se a ka ikur apo është djegur”, tha Maslar.
E disa prej familjarëve të të zhdukurve nuk flasin dot nga emocionet.
“Vajza jeton me mua, e lindi vajzën vetëm dy javë pas zhdukjes së burrit dhe me muaj të tërë nuk ia ka vendosur emrin pasi që po e priste burrin”, tha Lumturije Voca familjar.
Kurse, ambasadori i BE-së në Kosovë, Tomas Szunyog, i ka bërë thirrje dyja shteteve që të përkushtohen më shumë për personat e pagjetur.
“Ne me sukses kemi arritur t’i identifikojmë më shumë se 90% të personave të vrarë gjatë konfliktit në Kosovë por fatkeqësisht janë edhe mbi 1.600 persona që akoma nuk janë identifikuar dhe natyrisht që kjo i rëndon shumë familjet. Prandaj është e rëndësishme të punohet këtë drejtim dhe mendoj se shoqëria civile po bënë një punë të mirë. Si BE kemi ndërmjetësuar një marrëveshje për personat e pagjetur por fatkeqësisht grupet punuese nuk i zbatojnë këto marrëveshje”, tha Szunyog.
E roli i shoqërisë civile në këtë drejtim po shihet si shumë i rëndësishëm.
“Ky forum është platforma e vetme rajonale dhe që nga viti 2006 e tutje ka qenë një dritare për shoqërinë civile dhe veçanërisht për komunitetin e viktimave që të debatojnë mbi rëndësinë e mekanizmave të drejtësisë tranzicionale”, tha Bekim Blakaj nga Fondi për të Drejtën Humanitare.
“Këto lloj forume janë shumë të rëndësishme sepse janë në nivel regjional dhe këto çështje duhet të diskutohen në këtë mënyrë. Çështja e personave të pagjetur mund të zgjidhet vetëm nëse ka një bashkëpunim të sinqertë regjional ndërmjet shteteve dhe shoqëria civile shërben si një urë lidhëse”, tha Marko Milosavljeviq nga YIHR.
Ky forum për Drejtësi Tranzicionale në vendet e Ish-Jugosllavisë i është dedikuar kujtimit të personave të zhdukur gjatë luftës së fundit në Kosovë, nën moton Dinjitet për të Zhdukurit.
/teve1.info/
