Kryetari i sapozgjedhur i Kuvendit të Kosovës, Dimal Basha, ka komentuar për herë të parë dorëheqjen e Liburn Aliut nga posti i ministrit të Infrastrukturës, duke thënë se pakënaqësitë brenda një subjekti politik janë të natyrshme dhe pjesë e demokracisë.
Në një deklaratë për media, Basha tha se kishte mësuar për dorëheqjen e Aliut nga raportimet në media dhe nuk deshi të komentojë shumë, por vlerësoi lartë kontributin e tij në Lëvizjen Vetëvendosje dhe në Qeveri.
“Sa për informacionin tuaj, unë lexova në media që ka dhënë dorëheqje nga pakënaqësia e tij me rastin e votimit tim si kryetar të Kuvendit. Nuk dua të komentoj shumë, përveç që e çmoj kontributin si aktivist i VV-së, siç e çmoj kontributin e secilit aktivist tjetër që ka dhënë shumë për Lëvizjen Vetëvendosje.”
Basha shtoi se, pavarësisht dallimeve, është e rëndësishme që rrugëtimi politik të vazhdojë.
“Është komplet e natyrshme me pas pakënaqësi mes vete. Unë edhe si deputet kam pas pakënaqësi me ministra dhe kemi pas debat të hapur në Kuvend. Kjo është demokracia. Edhe në familje ke pakënaqësi kajherë, por me rëndësi është që të vazhdojmë rrugëtimin para.”
Ai përfundoi duke ripërsëritur vlerësimin për punën e Aliut si ministër:
“E çmoj kontributin e tij si në Lëvizje dhe në Ministri.”
