Pas gati 7 muajsh bllokadë, Kuvendi i Kosovës u bë me kryetar të ri.
Në seancën e së martës për konstituim, propozimin e bëri deputetja Arbërie Nagavci.
Me 73 vota për, 30 kundër dhe 3 abstenime, Dimal Basha nga Lëvizja Vetëvendosje u zgjodh kryeparlamentar.
Votë kundër i dhanë nga LDK, tre deputetë nga PDK, NISMA dhe deputetja nga radhët e komunitetit boshnjak, Duda Balje.
Pasi u zgjodh kryekuvendar, Basha mori fjalën para deputetëve.
Seanca vazhdoi sipas rendit të ditës.
Propozimi për nënkryetarë të Kuvendit u bë në pako. Nga Vetëvendosje u zgjodh Albulena Haxhiu, nga PDK Vlora Çitaku, ndërkaq Kujtim Shala nga LDK.
Deputetët miratuan edhe propozimin e komuniteteve joshumicë, joserbe, për votim të nënkryetarëve me rotacion. Nga ky grup, nënkryetarë me rotacion do të jenë Emilja Rexhepi, Fidan Gjilta dhe Artan Asllani.
Situate ndryshoi në momentin e propozimit për nënkryetar nga radhët e Listës Serbe.
Kjo parti tri herë radhazi propozoi deputetin, Sllavko Simiq i cili nuk arriti të sigurojë numrat e mjaftueshëm.
Më pas, procesi u kthye në votim përmes shortit.
Ndonëse në short u hodhën në votim tre kandidatë të komunitetit serbë, as ata nuk morën votat e mjaftueshme.
Ngjashëm ndodhi edhe me deputetin, Nenad Rashiq. Ai mori 55 vota pro, një ishte kundër dhe 17 abstenuan.
Seanca u mbyll, e pas kësaj, deputeti nga LVV, Hekuran Murati, tha se nëse vazhdon qëndrimi i njëjtë i PDK-së dhe LDK-së, rasti mund të humbet në Gjykatën Kushtetuese.
“Unë shpresoj që përgjatë këtyre 48 orëve në vijim do të ketë një reflektim dhe PDK, LDK, AAK dhe Nisma të cilat nuk ishin fare prezent sot në sallë të kthehen në seancën e pasnesërme dhe të votojnë për kandidatin Nenad Rashiq, në mënyrë që të përmbyllet konstituimi i Kuvendit”, tha Murati.
Për këtë çështje foli edhe kryetari i LDK-së, Lumir Abdixhiku.
“…ajo çka është fatkeqe është që Kosova të mos mbetet me institucione peng të vullnetit të Beogradit. E mendoni nesër një situatë ku Lista Serbe nuk propozon fare emër, dhe më pas i gjithë institucioni i Kosovës mbetet i bllokuar. Pra, këtë praktikë nuk guxojmë ta lejojmë e besoj që këtu ka ndodhur një lëshim i madh politik nga kryetari i ri, por edhe partia e parë”, tha ai.
Nga Instituti Demokratik i Kosovës thanë se gjatë procesit të zgjedhjes së dy nënkryetarëve nga radhët e komuniteteve joshumicë ka pasur shkelje procedurale, pasi sipas tyre, votimi është dashur të bëhet në pako.
Zgjedhjen e kryetarit e ka mirëpritur e para e shtetit, Vjosa Osmani, derisa shpreson që sa më parë, Kuvendi të votojë edhe Qeverinë e re.
Seanca e radhës për konstituim të Kuvendit është thirrur të enjten në orën 11:00.
