Një nga një u numëruan të gjitha votat e zgjedhjeve të 9 shkurtit.
Këtë procedurë, Kosova e praktikon që nga mbajtja e zgjedhjeve të para.
Ky proces, që lë hapësirë për keqpërdorime, sipas monitoruesve të procesit duhet të dixhitalizohet.
Kështu thotë Vullnet Bugaqku nga KDI.
“Ne kemi vlerësuar që është e domosdoshme që KQZ dhe shteti i Kosovës në të ardhmen ta mendojnë idenë e digjitalizimit rreth procesit të numërimit të paktën të rezultateve të votave për kandidatë dhe kjo bëhet nëpërmjet aparaturave speciale që janë për kalimin e fletëvotimeve dhe futjen e të dhënave në një softuer i cili i proceson të gjitha votat e kandidatëve dhe në atë mënyrë rezultati nuk ka se si të manipulohet dhe nuk ka se si të zvarritet”.
Kështu, Bugaqku thotë se do të shuheshin të gjitha dilemat për votat e kandidatëve për deputetë.
“Deri tani jemi duke parë edhe vet dhe jemi dëshmitarë se në secilën zgjedhje po kemi zvarritje të përmbylljes së procesit edhe të shpalljeve të rezultateve përfundimtare për faktin që po ka shumë ankesa dhe parregullsi nga ana e komisionarëve që po numërojnë votat e kandidatëve”, tha ai.
Përveç ankesave të kandidatëve për deputetë, që nga fillimi i procesit, KQZ u përball me shumë vështirësi.
Prandaj, ish-kryeshefi i Komisionit Qendror të Zgjedhjeve, Mazllum Baraliu, vlerëson se në të ardhmen KQZ duhet t’i adresoj me patjetër këto problematika.
“Do të duhej që të jetë më e përgatitur KQZ, që do të duhej që ato makina që i kanë marrë, do të duhej të ishin më të përgatitur, do të duhej të kishte njerëz që në teknologjinë informative do të jenë të gatshëm pranë makinave dhe të reagojnë para se të ndodhë çfarëdo ndërhyrje siç ka ndodhur nga jashtë e nuk po dihet, nuk kemi qartësi as transparencë të procesit, se çfarë ka ndodh e kush ka ndërhy”, tha Baraliu.
Për shkak të dyshimeve për parregullsi, 50 vendvotime, 35 nga të cilat nga qyteti i Vushtrrisë, janë rikthyer në rinumërim. Ankesa ka pasur edhe për votimin me postë, si dhe për votimin e diasporës në konsulata.
