Një punë disa vjeçare u thuajse u shkatërrua brenda pak minutash.
Plantacioni prej 5 hektarësh i mbjellë me drunj të llojit “Pallovnia” në fshatin Lloshkobarë të Ferizajt është përfshirë nga flakët, duke i shkaktuar dëme të mëdha një biznesi.
Menaxheri i plantacionit, Fehmi Aliu, tregoi se zjarri përfshiu të mbjellurat me shpejtësi, duke rrezikuar të shuante të gjithë biznesin në pak minuta.
“Sipas një statistike, dëmet shkojnë deri në 60-70 mijë euro. Ky është një lloj druri industrial që zhvillohet dhe rritet shumë shpejt, por kërkon shumë punë. Kjo është hera e katërt që punojmë. Kemi bërë shumë shpenzime dhe në një kohë shumë të shkurtër, për 10 minuta, mund të na shuhej gjithë biznesi”, tha menaxheri i plantacionit, Fehmi Aliu.
Për të ndihmuar në fikjen e zjarrit, përveç zjarrfikësve, në vendngjarje intervenuan edhe vetë punonjësit e biznesit dhe qytetarë të tjerë.
“Fikja e zjarrit ka qenë shumë e vështirë. Ne i kemi dalë në ndihmë me disa bombola, bashkë me qytetarë dhe miq. Unë kam ardhur pas zjarrfikësve, ishte shumë vështirë, flakë e madhe. Por falë zjarrfikësve dhe Zotit, u shua”, tha Aliu.
Aliu dyshon se zjarri është shkaktuar qëllimisht dhe nuk është rasti i vetëm.
“Ky zjarr është i qëllimshëm. Edhe para një jave është djegur pjesa e pasme ku janë përfshirë 3 hektarë të tjerë. Policia thotë që është arrestuar dikush, por kërkojnë dëshmitarë kur personi është lajmëruar vetë. Çfarë kanë për të kërkuar dëshmitarë?”.
Përveç plantacionit të pemëve, zjarri ka përfshirë edhe pronën e një fermeri tjetër në të njëjtën zonë, duke dëmtuar tërësisht 5 hektarë me mjedra, 5 hektarë me dredhëza dhe 1 hektar me arra.
Nga Policia e Kosovës është konfirmuar se rasti është duke u hetuar.
“Raportohet se persona të panjohur u kanë vënë zjarrin pronave të dy viktimave, ku janë djegur rreth 3 hektarë me mal, 5 hektarë mjedër, 4 hektarë dredhëza dhe 1 hektar me arra, të cilat janë djegur në tërësi”, thuhet nga Policia e Kosovës.
Tëvë1 ka tentuar të marrë një qëndrim edhe nga zjarrfikësit në Ferizaj por të njëjtit ishin në një intervenim.
Zjarre të mëdha janë shënuar ditëve të fundit në disa zona të Kosovës, duke shkaktuar dëme të konsiderueshme në prona private dhe në mjedis.
