Institucionet e shtetit janë duke punuar për kapjen e të burgosurve të cilët janë larguar nga burgjet e Kosovës në ditën e fundit. Kështu thanë të shtunën në një konferencë për media, drejtori i Shërbimit Korrektues të Kosovës Ismail Dibrani dhe zëvendësministri i Drejtësisë, Blerim Sallahu.
Dibrani tha se është në koordinim me institucionet e sigurisë për ta menaxhuar situatën.
“Jemi në koordinim me institucionet e sigurisë për ta menaxhuar situatën”, tha Dibrani.
Ndryshe, drejtori ka paralajmëruar masa ndaj personave përgjegjës për ikjen e të burgosurve, por ka thënë se janë në pritje të raporteve.
Ai ka shpreh keqardhje me rastet që kanë ndodhur ku ka thënë se të larguarit nga burgu i tipit të hapur kanë gëzuar të drejtën e vikendit, sipas asaj që ua garanton ligji.
“I dënuari Faton Hajrizi ka qenë i dënuar prej 25 vitesh, ai ka përfunduar 1/2 e dënimit në vitin 2012 dhe sipas legjislacionit në fuqi i dënuari i cili kalon 1/2 e dënimit, ka të drejtë ta kalojë vikendin në shtëpi. I njëjti për disa herë ka shfrytëzuar këtë mundësi, pra e ka kaluar vikendin në shtëpi por është rikthyer në burg”.
“Po ashtu i dënuari tjetër (Ujkan Mataj) ka qenë i dënuar më 11 vite dhe i njëjti në janar të këtij viti e ka fituar të drejtën për ta shfrytëzuar vikendin në shtëpi”, u shpreh Dibrani.
Sipas tij, janë 56 persona të cilët nga burgjet e Kosovës janë arratisur ose nuk janë kthyer pasi kanë shfrytëzuar të drejtën e vikendit jashtë.
Dibrani tha se në burgjet e sistemimit të hapur të burgosurit nuk përcillen nga oficerët gjatë kryerjes së aktiviteteve të ndryshme, si punimi i tokës, ruajtja e bagëtive etj.
Ndërkohë, zëvendësministri i Drejtësisë, Blerim Sallahu u arsyetua se këto ikje kanë ndodhur si shkak masave jo të larta të sigurisë në Institucionet Korrektuese, pasi ata kanë qenë në tipe të hapura.
Ai tha se të burgosurit që mbajnë dënimet në llojin e tipeve të hapura të institucioneve, e kanë më të lehtë të shfrytëzojnë mundësinë për t’u arratisur.
Derisa përmendi këto arsye, ai tha se mund të ketë arratisje në vazhdimësi.
Sallahu tha se me kapjen e tyre, do tu largohen të gjitha privilegjet duke i kthyer në tipe te mbyllura me siguri të lartë dhe ndaj të njëjtëve do të iniciohet procedurë penale./teve1.info/
