Pas takimeve që diplomatët evropianë e amerikanë patën në Prishtinë dhe Beograd, të shtunën nuk janë dhënë detaje konkrete se cfarë u është kërkuar palëve, në drejtim të normalizimit të marrëdhnieve. Krahas kësaj, nga njohës të fushës po konsiderohet se faktori ndërkombëtar “nën ombrellën” e dialogut po tenton t’i minimizojë ngjarjet e 24 shtatorit, e shkak për këtë po lënë diplomacinë kosovare.
Takimi i së shtunës, mes pesëshes euro – amerikane me palën kosovare e më pas me atë serbe, në fokus kishte që dy shtetet t’i rikthehen procesit të dialogut.
Krahas kësaj, çështje diskutimi ishte edhe rasti i 24 shtatorit, për të cilin fillimisht i dërguari i BE-së për dialogun, Miroslav Lajçak kërkoi që të vihet fajori para përgjegjësisë.
E një ditë pas takimit, i njëjti në rrjete sociale nënvizoi se rasti i Banjskës nuk e ndryshon situatën, ndërkohë që theksin e vuri tek fokusimi në vazhdimin e dialogut.
Njohësi i çështjeve politike, Albinot Maloku thotë se në rastin e Banjskës, deri tek neglizhenca nga faktori ndërkombëtar, erdhi si pasojë e diplomacisë kosovare.
“Sa i përket audiencës së brendshme, Qeveria e Kosovës ka arritur që ta shpalosë maksimalisht çështjen e Bansjkës, mirëpo kam përshtypjen se në aspektin diplomatik kemi dështu dhe për pasojë e kemi situatën ku edhe ndërmjetësi seç dëshiron t’a abstrehojë situatën e Banjskës në çështjen e dialogut, që është më se e vërtetë se jetësimi i marrëveshjes me Kosovës dhe Serbisë është obligim pavarësisht të gjitha ngjarjeve që mund të ndodhin”, ka thënë njohësi i çështjeve politike, Albinot Maloku.
Edhe profesori universitar Seb Bytyçi vlerëson se ka tendenca nga blloku evropian për minimizim të sulmit terrorist në veri të vendit.
“Gjatë deklaratave të të deleguarit Lajçak pati një fjalor mjaftë minimizues ku ai foli për individë dhe jo për grup të armatosur, e gjithashtu foli vetëm për keqbërësit e jo për përgjegjësit e organizimit të atij sulmi. Duhet theksuar se sulmi nuk bën ndikim në marrëveshjet e mëhershme po duhet të ndikojë në marrëveshjet e ardhshme”, është shprehur profesori universitar, Seb Bytyqi.
Televizioni ka tentuar të marrë përgjigjje nga Qeveria e Kosovës si dhe nga Bashkimi Evropian në lidhje me takimet e mundshme apo periudhën kohore kur palët duhet të përmbushin kërkesat e këtyre të fundit, mirëpo deri në publikimin e kësaj kronike nuk ka pasur përgjigjje.
