Në ditët e fundit të muajit korrik krerët e shtetit do të presin vizita nga Shtetet e Bashkuara të Amerikës.
Siç mëson Tëvë1, të dielën nënsekretari i Departamentit të Mbrojtjes të Shteteve të Bashkuara të Amerikës, Derek Chollet pritet ta vizitoi Kosovës, së bashku me zyrtarë të tjerë të lartë amerikan të sektorit të sigurisë.
Ky delegacion amerikan, pritet të ketë takime të ndara me presidenten e vendit Vjosa Osmani dhe kryeministrin Albin Kurti.
Situata e sigurisë dhe dialogu Kosovë – Serbi mendohet që do të jenë temat e këtyre takimeve.
Por, njohësi i çështjeve politike Melazim Koci thotë, se Chollet në Kosovë do të vijë me qëllimin që të riaktualizojë planin franko-gjerman.
Ndërsa, njohësi i çështjeve të sigurisë Shkelzen Sopjani, thotë se vizita eventuale e Chollet, tregon se gjendja e sigurisë është serioze.
Derek Chollet në cilësinë e Këshilltarit të lartë të Departamentit amerikan të Shtetit, e kishte vizituar Kosovën më 11 janar të këtij viti.
