Futbollisti i madh argjentinas, Angel Di Maria ka përmbushur një premtim që bëri 18 vjet më parë dhe është rikthyer në klubin e tij të lindjes në Argjentinë.
Di Maria lindi në Rosario dhe ishte anëtar i Rosario Central që nga mosha katër vjeç. Ai debutoi në ekipin e parë të futbollit në moshën 17 vjeç dhe dy vjet më vonë u largua nga klubi dhe u transferua te Benfica.
Në vitin 2007, ai bëri një premtim se do të kthehej në klub për të përfunduar karrierën e tij, dhe tani më në fund e ka bërë këtë.
Pas Benficës, Di Maria luajti për Real Madridin, Manchester Unitedin, Paris Saint-Germain, Juventusin dhe përsëri për Benficën.
Dhjetë muaj më parë, ai duhej të kthehej në Rosario, por mori kërcënime me vdekje, ndërsa tani ka lënë anash kërcënimet për tu rikthyer.
“Motrës time iu soll në kafenenë e saj një kuti që përmbante kokën e një derri me një plumb në ballë, me një mesazh se nëse do të kthehesha në Rosario Central, koka tjetër do të ishte ajo e vajzës sime, Pie”, tha Di Maria verën e kaluar.
Megjithatë, kjo nuk e lëkundi atë dhe dje (e enjte) mbrëma ai u prezantua zyrtarisht si futbollisti i ri i Rosarios.
Gjatë karrierës së tij, Di Maria fitoi kampionatet e Spanjës, Francës dhe Portugalisë, si dhe Ligën e Kampionëve.
Ai luajti 145 ndeshje për ekipin kombëtar argjentinas, duke shënuar 31 gola dhe duke fituar Kupën e Botës dhe dy Kupa të Amerikës.
