Në parkun e lagjes “Arbëria” në kryeqytet, mbrëmjen e së shtunës ka ndodhur një ngjarje e rëndë. Përderisa ishte duke ecur, një 11-vjeçare është ndaluar nga disa persona e është dhunuar seksualisht. Për rastin në fjalë, kanë filluar edhe hetimet.
E sipas dosjes së Prokurorisë, pasi ishte dhunuar nga dy të dyshuarit e parë, viktima në afërsi të shtëpisë së saj ishte ndalur edhe nga një person tjetër. Ky i fundit ishte me veturë së bashku me persona të tjerë, të cilët viktimën e kishin dërguar në një vend tjetër. Aty përshkruhet se viktima ishte dhunuar sërish.
“Pastaj rrugës tek varrezat kanë zbritur i mituri dhe, dhe Zh.S., ndërsa i pandehuri së bashku me G.J,.dhe të dëmtuarën janë larguar me veturë, ashtu që pas pak E.R., ka ndaluar veturën në një vend të panjohur dhe ka kryer marrëdhënie seksuale me të dëmtuarën. Edhe pse e ka ditë që e dëmtuara është nën 14-vjeç”, thuhet në njoftimin e Prokurorisë Themelore të Prishtinës.
Prokuroria për dy të arrestuarit, ka kërkuar masën e paraburgimit prej 30 ditësh. Këtë e ka konfirmuar zëdhënësja Laureta Ulaj.
Sipas organit ndjekës njëri nga të dyshuarit është i njohur për organet e rendit për vepra të ngjashme penale.
E pas deklaratës së dhënë nga viktima, ajo është dërguar në strehimore.
Nga rrjeti I Grave të Kosovës thonë se viktima tashmë është e sigurtë atje, mirëpo kërkojnë nga institucionet përkatëse të japin dënime meritore.
E në raportimin 24 orësh të Policisë së Kosovës ishte raportuar edhe për një rast tjetër i dhunimit në Fushë-Kosovë.
Kronika e gazetares Valëza Sylejmani.
