Dhoma e Tregtisë dhe Industrisë Kosovë (DhTIK) është përzgjedhur Anëtare Kandidate e Zgjerimit (Enlargement Candidate Member – ECM) në Komitetin Ekonomik dhe Social Evropian (EESC), duke shënuar një hap të rëndësishëm drejt përfshirjes më aktive të sektorit privat të Kosovës në proceset evropiane.
Sipas njoftimit zyrtar, me këtë status, DhTIK, si përfaqësuese e qindra bizneseve në vend, do të kontribuojë në hartimin e opinioneve të EESC-së që lidhen me organizatat e shoqërisë civile dhe procesin e zgjerimit të Bashkimit Evropian.
Përzgjedhja nga EESC përbën një njohje të rëndësishme ndërkombëtare për rolin e Dhomës në përfaqësimin e interesave të komunitetit të biznesit në Kosovë, si dhe krijon një mundësi të drejtpërdrejtë për pjesëmarrje në proceset konsultative dhe politike të Bashkimit Evropian.
“DhTIK mbetet e përkushtuar që, përmes këtij angazhimi, të avancojë zërin e sektorit privat të Kosovës dhe të kontribuojë në procesin e integrimit evropian të vendit”, theksohet në komunikatë./teve1.info/
