Dhoma e Tregtisë dhe Industrisë Kosovë ka përshëndetur formimin e Kuvendit të Kosovës dhe zgjedhjen e Qeverisë së re, duke e cilësuar këtë zhvillim si një moment të rëndësishëm për forcimin e stabilitetit institucional në vend.
Në reagimin e saj, DHTIK thekson nevojën për intensifikimin e dialogut ndërmjet sektorit publik dhe atij privat, duke vënë në dukje se bizneset po përballen me një sërë sfidash që kërkojnë trajtim të shpejtë dhe zgjidhje konkrete nga institucionet.
Sipas Dhomës, periudha në vijim duhet të shfrytëzohet për adresimin e çështjeve ekonomike me prioritet, në mënyrë që të krijohet një ambient më i favorshëm për zhvillim dhe investime.
Përmes një njoftimi zyrtar, DHTIK ka shprehur gatishmërinë për të kontribuar aktivisht me ekspertizë profesionale, rekomandime konkrete dhe bashkëpunim të vazhdueshëm institucional, me qëllim të nxitjes së rritjes ekonomike dhe përmirësimit të mirëqenies së qytetarëve.
