Sipas shifrave qeveritare, rreth 155,000 persona u zhvendosën gjatë luftimeve dhe u strehuan në xhami dhe kisha në zona të tjera të qytetit.
Autoritetet bëjnë të ditur se ata tani janë të lirë të kthehen në shtëpitë e tyre nëse dëshirojnë, ndërsa qeveria do të vërë në dispozicion autobusë për këtë qëllim.
E njëjta formë transporti ishte përdorur edhe për largimin e tyre fillestar. Megjithatë, infrastruktura dhe kushtet e jetesës në të gjithë Alepon mbeten një sfidë serioze pas 14 vitesh lufte civile.
Situata është veçanërisht e vështirë në zonat e prekura nga luftimet, si Sheikh Maqsoud dhe Ashrafieh, ku furnizimi me ujë dhe energji elektrike është i dobët, njofton Al Jazeera.
Ministri i Energjisë, Mohammed al-Bashir, deklaroi se pompimi i ujit në qytetin e Alepos ka rifilluar. Ky rifillim ndodhi disa orë pasi furnizimi ishte ndërprerë, për shkak të asaj që autoritetet siriane e përshkruan si një “sulm nga organizata SDF” ndaj stacionit të pompimit al-Babiri në fshatin lindor të Alepos.
Ministria e Brendshme e Sirisë njoftoi në Telegram se ushtria “i paralajmëron qytetarët të mos i afrohen ose të mos prekin objekte të dyshimta, duke theksuar nevojën për kujdes të jashtëzakonshëm gjatë lëvizjes dhe duke i nxitur ata që të raportojnë menjëherë çdo aktivitet ose objekt të dyshimtë te njësitë e sigurisë të vendosura në lagje”.
Sipas ministrisë, trupat e SDF-së kanë vendosur eksplozivë në disa shtëpi civile, ndërtesa publike dhe automjete të parkuara në rrugë.
Forcat Demokratike Siriane (SDF) të udhëhequra nga kurdët rënë dakord të tërhiqen nga Aleppo pas disa ditësh dhune vdekjeprurëse, ku mbetën të vrarë të paktën 30 persona.
