Dhimbjen për të birin s’ia larguan as vitet.
Por lotët e nënë Nailes, sa dhimbje janë po aq edhe krenarie, për Ilaz Kodrën me shokë që u bënë simbol i lirisë.
Ndjenja e krenarisë pushtoi këtë të shtunë Prekazin, ku u përkujtuan ata që dhanë jetën në mbrojtje të pragut.
Në lagjen Kodra, u përurua edhe lapidari me emrat e dëshmorëve e martirëve të rënë në vitet 1998-99.
Aty u tha se ky lapidar, do të jetë dëshmi për brezat e rinj, që historia të mos harrohet.
“Këta martirë dhe dëshmorë nuk janë vetëm emra të gdhendur, ata janë krenaria jonë, janë drita që na udhëheq, janë themeli ku qëndron liria jonë sot. Ata dhanë më të shtrenjtën, jetën që ne të jetojmë sot me dinjitet, të lirë dhe me të ardhme”, tha bashkëluftëtari Hasan Kodra.
Të flasë për shokët e luftës, tha se se ka fare lehtë ish gjenerali Sami Lushtaku.
“Në Prekaz e sidomos tek kodralitë, nuk besoj që ka ndonjë shtëpi ë nuk ka pasur ushtar, dhe nuk ka shtëpi që nuk ka dhënë bukë për Ushtrinë Çlirimtare të Kosovës. Adem Jashari dhe grupoi i tij këtu e kanë pasur çerdhen”, tha Lushtaku.
Andaj u theksua nevoja që të punohet më shumë, e historia të mos shtrembërohet e as të harrohet.
“Ky lapidar, kjo shenjë e kujtesës historike do të flas më mirë se të gjithë ne sepse kushdo që vije dhe e sheh, do ta kuptojë dhe do ta mësoj historinë se për të ardhur tek liria, është dashur sakrificë e madhe dhe këtë sakrificë e kanë bërë bijtë dhe bijat e rreshtuara në UÇK”, tha kryetari i Shoqatës së Familjeve të Dëshmorëve, Xhavit Jashari.
Ceremonia u përcoll me poezi, këngë e valle.
