14 pacientët që kanë pësuar lëndime nga djegiet si pasojë e shpërthimit nga bombola e gazit dhe një tjetër me lëndime në gjoks janë transferuar për mjekim të mëtutjeshëm në klinika të ndryshme të Qendrës Klinike Universitare të Kosovës (QKUK).
Shërbimi Klinik Universitar (ShSKUK) ka bërë të ditur se katër nga ta janë operuar në sallat emergjente, kurse te të tjerët janë kryer ndërhyrje në sallën e vogël të ndërhyrjeve kirurgjike, Shërbimin e Reanimimit dhe atë Kirurgjik, të po kësaj klinike.
Ndërkohë, është theksuar se katër pacientë janë transferuar për mjekim të mëtejshëm në Mjekimin Intensiv Qendror, meqë kanë gjendje më të rënduar shëndetësore nga djegia.
“Tetë pacientë janë transferuar në Klinikën e Kirurgjisë Plastike, ku po e vazhdojnë trajtimin dhe mbikëqyrjen nga stafi shëndetësorë. Dy në Kirurgjinë Abdominale dhe një do të transferohet në Kirurgji Torkale”, thuhet në njoftim.
Gjithashtu, thuhet se stafi mjekësor dhe infermieror i këtyre klinikave do të vazhdojë të ofrojë kujdes dhe mbikëqyrje shëndetësore 24-orëshe për pacientët./teve1.info/
