Ishte mbrëmje e së premtes dhe në shtëpi gjendeshin babai me tre fëmijët.
Por kjo pasdite e vonë nuk përfundoi mirë dje për një familje në Gjilan.
Kjo pasi fëmiu 11-vjeçar dyshohet se e goditi me sëpatë të atin e tij.
Si pasojë e plagëve të marra, viktima fillimisht u dërgua për trajtim në Spitalin Rajonal të Gjilanit, e më pas për shkak të gjendjes së rënduar u transportua për në Qendrën Klinike Universitare.
E të shtunën, nga QKUK nuk dhanë shumë detaje për gjendjen e tij.
I gjithë rasti kishte ndodhur gjersa nëna nuk gjendej në shtëpi.
E pas gjithë ndodhisë, fëmijët i mori nën kujdes Qendra për Punë Sociale në Gjilan.
Por për këtë familje, ky nuk qëllon të jetë incidenti i parë i shënuar.
Nga QPS, treguan për televizionin se në këtë familje ka pasur raste të tjera të ushtrimit të dhunës fizike, e ku viktimë ka qenë burri.
“Ndoshta fëmijët kanë kopjuar veprimet e nënës sepse në këtë familje ka pas dhunë në vazhdimësi po që viktimë ka qenë burri. Është kjo nanë që në disa raste e ka rrah burrin e vetë”, deklaroi drejtori i QPS, Gjilan – Mursel Zymberi.
Ndërkohë fëmija i dyshuar për rastin, ka pengesa të zhvillimit mendor.
“Rasti ka qenë shumë i rëndë sepse situata ka qenë tepër e tensionuar dhe fëmija që ka bërë veprimin që me gjasë është edhe pengesa në zhvillim mendor, prandaj edhe jemi obligu si Qendër për Punë Sociale me e marr me e vendos në një strehimore këtu afër Gjilanit”, tregoi drejtori.
Gjendja e 11-vjeçarit vlerësohet të jetë duke u rehabilituar.
“Tash gjendja e fëmijëve fillon duke u rehabilitu. Për njërin prej fëmijëve që dyshohet që e ka kry veprimin është realizuar edhe vizitë mjekësore sepse përdor terapi dhe nëna e vetë nuk e di cilën terapi saktë duhet me ia dhënë”.
Sipas Zymberit, kjo familje i takon komunitetit serb, dhe jetojnë në kushte të rënda ekonomike.
Tëvë1 ka tentuar të marrë detaje shtesë edhe nga Policia e Kosovës, por të njëjtit kanë thënë se për shkak që në rast është i përfshirë një i mitur, nuk mund të japin përgjigje.
Kronikë e realizuar nga gazetarja Adea Mustafaj.
