Në punë dolën në ora 08:00 të mëngjesit.
Por, dita e punës për dy punonjës të Zyrës për Punësim në Lipjan, përfundoi pas vetëm 15 minutave.
Kjo meqë tavani në zyrën e tyre u shembë, duke i zënë përfundi.
E për nxjerrjen e tyre, u desh të angazhohet pjesa tjetër e stafit.
“Kur shikoj në zyre, siç ka qenë duke punuar në kompjuter, Sylejman Llugiqi, e zënë ai konstruksioni i tavanit dhe kish mbetur i kërrusur në tavolinë, i rrjedhke gjak të koka. U shqetësuam, kemi hyrë e kemi nxjerrë. Ishte ndoshta me shumë shqetësim sesa plagë”, tha Ismet Gashi, udhëheqes i Zyrës së Punësimit në Lipjan.
Udhëheqës i Zyrës së Punësimit në Lipjan, thotë se këto punime u kryen rishtazi.
“Renovimi i zyrës është bërë në nëntorin e kaluar, ai materiali i rinovua ka rënë. Diku me 25 nëntor të vitit 2024 ka përfunduar renovimi”, tha ai.
Njëri nga punonjësit pësoi lëndime në regjionin e kokës.
Për këtë, në vendin e ngjarjes u thirren edhe ekipet emergjente.
“Ne si ekip kemi shkuar menjëherë në vendin e ngjarjes, e kemi parë pacientin. E kemi vlerësuar gjendjen, i kemi matur parametrat. E kemi konstatuar që pacienti ka nevojë ta vazhdojë ekzaminimin e mëtutjeshëm në Prishtinë, gjendja ka qenë e mirë”, tha Diellza Govori, mjeke e përgjithshme në QKMF-në e Lipjanit.
Për gjendjen e dy punonjësve, Tëvë1 ka pyetur edhe në Qendrën Klinike Universitare të Kosovës.
Drejtori i Emergjencës, Naser Syla, tha se pas ekzaminimeve të nevojshme, të lënduarit janë lëshuar për në shtëpi.
