Autore: Adea Mustafa
Njësitet elite të Policisë së Kosovës, zbarkuan sot në tri agjenci shtetërore.
Me urdhër të Prokurorisë Speciale, për orë të tëra, u kryen bastisje në Agjencinë Kadastrale, Agjencinë Shtetërore të Arkivës, si dhe Institutin për Krime të Kryera gjatë Luftës në Kosovë.
Aksioni përfundoi me arrstimin e katër personave të dyshuar.
Që të gjithë, sipas Prokurorisë Themelore të Prishtinës, dyshohen për keqpërdorim të detyrës zyrtare.
“Lidhur me pyetjen tuaj ju njoftojmë, se Prokuroria Themelore në Prishtinë në koordinim dhe bashkëpunim të ngushtë me Policinë e Kosovës, sipas urdhëresës nga gjykata ka marrë aksion për bastisje dhe kontroll në institutcionin e arkivës shtetërore dhe institutcionin kadastral te Republikës së Kosovës për veprën penale “ Keqpërdorim i pozitës apo autoritetit zyrtar” nga neni 414 te Kodit Penal të Republikës së Kosovës. Prokurori i shtetit për çdo zhvillim të mëtejshëm do të ju mbajë të informuar”, është thënë nga Prokuroira.
Ndërkaq, policia ka konfirmuar se aksioni ka qenë i shtrirë në tri qytete të ndryshme, Prishtinë, Ferizaj dhe Shtime.
“Operacioni policor po realizohet mbi dyshimet për keqpërdorim të detyrës zyrtare. Pas përfundimit dhe kompletimit të zhvillimeve policore, në bashkëpunim dhe koordinim me organet e drejtësisë mund të bëhen publike informacione shtesë”, ka bërë të ditur policia.
Arrestimet besohet se ndërlidhen me rastin e shkëmbimit të një prone në lagjen “Veternik” të Prishtinës, me një kodër në një fshat të Prizrenit.
