Ka dështuar sot edhe përpjekja e 25-të për konstituimin e Kuvendit të Kosovës, njëherësh përbërjes së nëntë parlamentare, të dalë nga zgjedhjet e shkurti.
Deputetët për të shtatëmbëdhjetën herë me rradhë nuk votuan për formimin e një komisioni për mbikëqyrjen e një votimi të fshehtë për kryeparlamentarin e ri.
Nga 104 deputetë prezentë në sallë pro votuan vetëm 51 deputetë, 1 votoi kundër, ndërsa asnjë nuk abstenoi.
Seanca konstituive do të vazhdojë të mërkurën e 4 qershorit nga ora 11:00.
“Nuk kemi kuorum, ndërpritet seanca. Me 4 qershor në orën 11:00 shihemi përsëri”, ka thënë kryesuesi i seancës, Avni Dehari.
Ndryshe, për herë të parë seanca konstituive e Kuvendit të Kosovës u mbajt më 15 prill.
Deri më tani, deputetët kanë kaluar vetëm dy pika të agjendës së seancës konstituive: raportin e Komisionit të përkohshëm për verifikimin e mandateve dhe atë të betimit të deputetëve.
Por, procesi ka ngecur te pika e tretë: zgjedhja e kryetarit të Kuvendit të Kosovës pasi kandidatja e propozuar nga Lëvizja Vetëvendosje për këtë post, Albulena Haxhiu, nuk ka marrë përkrahjen e nevojshme./teve1.info/
