Kuvendi nuk konstituohet as në përpjekjen e nëntë
Ka dështuar për herë të nëntë përfundimi i seancës konstituve.
Kryesuesi i seancës, deputeti i LVV-së Avni Dehari, ka propozuar që këtë herë votimi për kryeparlamentarin të bëhet i fshehtë.
Kjo është kundërshtuar nga të gjitha grupet parlamentare, përveç LVV-së.
Seanca e radhës do të mbahet të shtunën nga ora 10:00.
1 Përmbledhje e seancës
Deputetët e Kuvendit të Kosovës kanë dështuar ta konstituojnë Kuvendin e Kosovës të enjten, në përpjekjen e nëntë, pasi nuk kaloi propozimi i kryesuesit të seancës, Avni Dehari, për votim të fshehtë për kryeparlamentarin.
Ndryshe nga herët e kaluara, nuk u propozua kandidati për kryetar të Kuvendit nga partia fituese e zgjedhjeve, Lëvizja Vetëvendosje.
Procesi ka ngecur pasi partia fituese, Lëvizja Vetëvendosje, nuk po arrin t’i sigurojë votat e nevojshme për kandidaten e saj për kryetare të Kuvendit.
2 Deputetët deklarohen pas dështimit të nëntë për konstituim
Krasniqi: Kurti po e konsideron më të rëndësishme Haxhiun sesa Kuvendin
Kryetari i PDK-së, Memli Krasniqi, ka thënë se propozimi i VV-së për votim të fshehtë për kryeparlamentar është e paligjshme dhe jokushtetuese.
Sipas Krasniqit, i cili foli pas dështimit tjetër të seancës konstituive, është e turpshme dhe fyese ajo çka ndodhi sot në Kuvend.
“VV-ja bëri shkelje të hapur kushtetuese. Në kohën kur ka filluar votimi dhe ka dështuar disa herë, është e paligjshme dhe jokushtetuese propozimi për votim të fshehtë. Po më vjen keq në çfarë situate po e vendosin Avni Deharin, po e keqpërdorin. Më arbitrare është se VV-ja po e konsideron më të rëndësishme Albulena Haxhiun sesa Kuvendin e qeverinë. Është e turpshme, fyese. Duke mos i pasur numrat për kryeministër, Kurti ka vendosur ta vazhdojë talljen edhe me deputeten Haxhiu. Kur ka dy kandidatë ka kuptim votimi i fshehtë”, ka thënë ai.
”
“Kosova po mbahet peng i emrit të Albulena Haxhiut”
Deputetja e AAK-së, Time Kadrijaj, ka thënë se Kosova po mbahet peng për emrin e Albulena Haxhiut.
“Nuk ka ndodh ndonjëherë një gjë e tillë (kërkesa për votim të fshehtë) apo një tendencë me bo një cirk në Kuvend. VV-ja është dashur t’i sigurojë 61 vota dhe jo të kalojë në seanca të tilla që nuk janë në rregull. Kosova po mbahet peng për një kandidat. Janë lidh me një emër”, ka thënë ajo.
Bajrami thotë se me votat e LDK-së Haxhiu s’do të bëhet kryetare e Kuvendit
Shefja e Grupit Parlamentar të LDK-së, Hykmete Bajrami ka deklaruar se me votat e LDK-së, Albulena Haxhiu s’do të bëhet kryetare e Kuvendit as edhe pas një procesi zgjedhor.
Bajrami ka thënë se Kosova është duke shkuar në zgjedhje pasi sipas saj LVV-ja i ka reduktuar gjithë problemet e qytetarëve të vendit në emrin e Albulena Haxhiut.
Abdixhiku: Është interes kombëtar refuzimi i qasjes politike të LVV-së
Kryetari i Lidhjes Demokratike të Kosovës (LDK), Lumir Abdixhiku, ka shprehur qëndrimin e tij pas dështimit të radhës për konstituimin e Kuvendit të Kosovës.
Abdixhiku ka akuzuar Lëvizjen Vetëvendosje (LVV) për veprim me “arbitraritet të plotë”, pas propozimit për ndërrimin e formës së votimit për kryeparlamentarin.
“A po e kuptoni tani, se pse me të tillët, nuk mund të kesh as takim e as mirëkuptim? Të takojnë, të mashtrojnë! Gjersa të thërrasin në takim, jashtë të ofendojnë. Në fund veprojnë në arbitraritet të plotë!. Sepse nuk njohin njerëzoren, as fjalën as kurrizin! Kjo politikë duhet të marrë fund! LDK do t’i japë fund!”, ka shkruar Abdixhiku.
