Ka dështuar të mbahet mbledhja e Komisionit ppër Ekonomi, Industri, Ndërmarrësi, Tregti dhe Inovacion, ku pritej të raportonte bordi i Zyrës së Rregullatorit të Energjisë, lidhur me vendimin për tarifat e energjisë elektrike, raporton KosovaPress.
Mbledhja dështoi për shkak të mungesës së kuorumit. Ishin deputetët e Lëvizjes Vetëvendosje, anëtarë të këtij komisioni që nuk u paraqitën në këtë mbledhje.
Sipas asaj që u tha nga deputetët e opzitës, bordi i ZRRE-së ishte i pranishëm në objektin e Kuvendit, porse ishin takuar me anëtarët e LVV-së. Lidhur me këto pretendime KosovaPress është interesuar të marrë një përgjigje nga palët e përmendura, porse të njëjtit nuk janë përgjigjur deri në momentin e publikimit të lajmit.
Zëvendëskryetarja e parë nga LDK-ja, Janima Ymeri tha se ZRRE duhet të përgjigjet dhe të tregojë se si funksionon ky rregullator.
“ZRRE nuk ka pasur dhe nuk ka as plan për vitin 2026, nuk ka raport për vitin 2025, nuk na njofton për tarifa gjithashtu. Nuk ka pengesa në anë të tregut të lirë që ata i demantojnë dhe vendimet e gjykatës për disa raste. Nuk është vetëm çështje financiare por edhe e sigurisë me të cilën ZRRE duhet të përgjigjet dhe të tregoj se si punon. E deklaroj këtë mbledhje të pamundur të vazhdoj “, tha Ymeri.
Tutje, Ymeri tha se ka dërguar kërkesë në Agjencinë për Informata dhe Privatësi për të nxjerrë informatat për ZRRE-në, duke theksuar se ka prova të mjaftueshme për skandal të madh nga VV-ja për “hajni” siç tha ajo, në sektorin e energjisë elektrike.
“Ky mund të jetë edhe fundi i pushtetit të Vetëvendosjes, por kjo nuk e ndalon punën me transparencë. Kam prova të mjaftueshme që kjo është skandali më i madh, hajnia në sektorin me energji, ka mbërri edhe në ministri. Sado që mundohen me i fsheh informatat dikur do të dalin, megjithëse i kam dërguar kërkesat në AIP do të shkojë deri në fund që të nxjerrën informatat. Do të del në pah se si është sabotuar sektori i elektroenergjetikës nga VV-ja”, shtoi ajo.
Ndërsa anëtari i komisionit nga radhët e PDK-së, Ferat Shala tha se anëtarët e komisionit kanë një varg pyetjesh për bordin e ZRRE, përgjigjet e të cilave duhet të jenë në dijeni parlamenti dhe qytetarët e vendit.
“Sektor ky i cili në mënyrë jashtëzakonisht të vështirë po ballafaqohet nga presioni politik dhe jo pa fajin edhe të tij. Sot kemi varg pyetjesh të cilët institucionet e vendit, parlamenti, qytetarët duhet të kenë përgjigje, çka po ndodh me afatet ligjore të një prillit që është dashur të filloj rishqyrtimi tarifor? Ne sot nuk kemi përgjigje për procesin e shtyrjes së afatit të liberalizimit të daljes në tregun e lirë të një pjese të konsumatorëve dhe ne kemi pyetje se si është e mundur”, tha Shala.
Edhe Besnik Tahiri nga AAK-ja kritikoi Lëvizjen Vetëvendosje.
Tahiri tha se mospjesëmarrja e ZRRE-së në këtë komision, ia ka konfirmuar ndikimin e plotë politik të Qeverisë mbi ta.
Ngritja e tarifave sipas Tahirit do të krijonin një kolaps ekonomik duke fundosur ekonominë e Kosovës.
“Ikja nga përgjegjësia nga ballafaqimi i ZRRE më konfirmon ndikimin e plotë politik të LVV-së të qeverisë mbi ta. Kryesuesja ma konfirmoi që këtu janë por kanë shkuar lart së pari, e kanë detyrën me qenë këtu para nesh. Çfarëdo vendimi që merret, çfarëdo hetimi ajo është me pull drejtpërdrejtë prej qeverisë, e cila siç po shihet ka ndikim të plotë mbi ta dhe parandalon një ballafaqim bukur të rëndësishëm. Paralajmërimet për ngritjen e tarifave do të krijonte një kolaps ekonomik të plotë dhe do ta fundoste ekonominë e Kosovës”, theksoi Tahiri.
Në këtë komision bordi i ZRRE-së do të duhej të raportonte mbi akuzat që po akuzohet ajo dhe pyetjet e anëtarëve të komisionit për ngritjen e tarifave.
