Ka dështuar të mbahet seanca e jashtëzakonshme e Kuvendit Komunal të Kryeqytetit. Në këtë seancë, pikë e rendit të ditës ka qenë propozim-vendimi për lënie në shqyrtim publik të projekt-dokumentit të Planit Zhvillimor Komunal 2025-2033. Të gjithë asamblistët e Lëvizjes Vetëvendosje dhe Partisë Demokratike të Kosovës nuk morën pjesë në këtë seancë, raporton KosovaPress.
Kryesuesi i mbledhjes, Ajet Brajshori tha se në sallë janë prezent vetëm 21 anëtarë.
“Sipas shërbimit të kuvendit nuk kemi kuorum për ta mbajtur mbledhjen në mungesë të të gjithë asamblistëve të LVV-së dhe të Partisë Demokratike të Kosovës. Andaj nuk mundemi të procedojmë më tutje, konstatoj të mbyllur mbledhjen e jashtëzakonshme”, deklaroi ai.
Pas dështimit të seancës së jashtëzakonshme, kryetari i kryeqytetit, Përparim Rama tha se dokumenti është përgatitur para një viti e gjysmë dhe nuk po tentohet të kalohet në fund të mandatit.
“Kemi bërë thirrje që sot të votojmë, që ta qesim për diskutim publik planin zhvillimor komunal, një dokument i cili është i gatshëm tashmë gati një vit e gjysmë e që bllokohet gjatë gjithë kohës prej opozitës, prej LVV po ashtu edhe prej PDK. Nuk i kishim ata asamblistët këtu, asamblistë të cilët janë të votuar nga qytetarë të kryeqytetit, të të cilët po shoh edhe shumë postime që thirren në jo transparencë. Është e kundërta prej asaj që po kërkojmë që një vit e gjysmë. Një dokument në të cilën kanë punuar drejtoritë, institucionet, kanë punuar qytetarë të ndryshëm”, deklaroi Rama.
Ai tha se qëllimi është që në këtë dokument të përfshihen propozime dhe sugjerime të reja.
“Ky dokument është me rëndësi të madhe për kryeqytetin në shumë sfera, në aspektin e edukimit, si zhvillohet edukimi mësimi në kryeqytet, në aspektin e shëndetit, si shërbehen qytetarët e kryeqytetit, në aspektin e zhvillimit rural. Ku i kemi investimet më të mëdha në kryeqytet, si unaza e qytetit, tash edhe fshati olimpik i cili është më se i nevojshëm për Lojërat Mesdhetare”, shtoi ai.
Gjatë deklarimit të Ramës para mediave, ai është përplasur edhe me ish-nënkryetarin e Prishtinës, Dardan Sejdiu.
Sejdiu: Sa lagje i keni vizituar. Sa lagje e kanë parë planin. Nuk po rrej po pyes.
Rama: Ne vizitojmë lagje tërë kohën, kemi vizituar të gjitha lagjet…Ja që njerëz si ti që japin dezinformata, njerëz si ti që i rrejnë të gjithë qytetarët e kryeqytetit. Të gjitha lagjet i kemi vizituar.
Sejdiu: Ja nise a, ja nise me akuza a?”, kanë thënë ata.
Njohësi i temave të banimit dhe ndërtimit, Driton Tafallari tha se “është jo e moralshme që në fund të mandatit të tentohet të miratohet ky plan”.
“Plani zhvillimor komunal është dokumenti i dytë më i rëndësishëm i Kosovës, pas Kushtetutës së Republikës së Kosovës. E ka për qëllim rregullimin e jetesës së të gjithë qytetarëve në qytet. E para, është jo e moralshme që në fund të mandatit të tentohet të miratohet një plan kaq i rëndësishëm. Sa i përket transparencës, këta po thonë që po japin një afat 30 ditor për konsultime publike, mirëpo kjo nuk është moralisht korrekte sepse 30 ditë nuk janë të mjaftueshme që të analizohet një dokument i cili po thuhet që është draft final”, shtoi ai.
Kryetari i Prishtinës, Përparim Rama ka njoftuar se do të caktohet seancë për javën e ardhshme. Lëvizja Vetëvendosje, qendra në Prishtinë e ka bojkotuar këtë seancë, ndërkohë që më parë ka thënë se “ky është tentimi i radhës për ta kontrabanduar dokumentin kryesor komunal mbi zhvillimin e qytetit, për të cilin ministria e Mjedisit ka konstatuar qartë shkelje të shumta procedurale dhe ligjore”.
