Për dy muajt e parë të këtij viti, partitë politike kanë mbetur pa fond të ndarë nga Komisioni Qendror i Zgjedhjeve.
Kjo pasi në mbledhjen e së mërkurës, KQZ nuk pati kuorum për ndarjen e këtyre mjeteve.
Drejtori ekzekutiv i IKD-së, Ehat Miftaraj thotë se kjo bëhet për arsyeje politike.
“Fatkeqësisht tash po bëhet gjithçka politikë, unë besoj se në një shtet normal partitë politike që përfaqësohen në KQZ do të duhej në radhë të parë të siguronin të respektohet kushtetuta, ligji për zgjedhjet dhe rregullativa tjetër ligjore. Ne e kemi thënë vazhdimisht që KQZ duhet të siguroj që të regjistroi partitë politike të cilat i përmbushin kushtet ligjore për të funksionuar me një shoqëri demokratike që pretendohet se është Kosova”, tha Miftaraj.
Ai thotë se këto vendime po monitorohen edhe nga ndërkombëtarët.
“Këto zgjedhje janë duke u monitoruar si nga ekspertë të huaj si ata vendorë, ne nesër nuk duhej të çuditemi kur raportet ndërkombëtare në një formë, e vënë një pikë të zezë lidhur me procesin zgjedhor, lidhur me atë se si është menaxhuar procesi zgjedhor dhe gjitha këto vendime që janë duke u ndërmarrë”, tha ai.
E sipas Violetë Haxhollit nga KDI, krejt kjo po bëhet për arsyeje që Lista Serbe të mos jetë përfituese e këtyre mjeteve.
“Tani duhet të shihet tutje nëse KQZ do të gjejë mënyrën për të ndarë këtë fond pasi që kundërshtimi i LVV-së po vazhdon për arsyeje që dihen pra për arsyeje që ky fond të mos i ndahet edhe partisë Lista Serbe. Megjithatë në këtë drejtim ashtu siç e ka përcaktuar edhe PZAP, Lista Serbe nuk asnjë ndalesë për të kandiduar në zgjedhje, pra i plotëson kriteret me ligj për të kandiduar është e barabartë me subjektet e tjera”, tha Haxholli.
Zgjedhjet parlamentare do të mbahen më 9 shkurt.
