Kuvendi i Kosovës edhe sot nuk arriti ta zgjedhë kryetarin e ri, pasi kandidati i propozuar nga Lëvizja Vetëvendosje, Hekuran Murati, nuk mori votat e nevojshme.
Kuvendi i Kosovës ka bërë një njoftimi ku thuhet se nga 115 deputetë të pranishëm, për Muratin votuan 57 deputetë, kundër ishin 52, ndërsa gjashtë abstenuan.
“Në bazë të rezultatit, kandidati i propozuar nuk ka marrë votat e nevojshme për t’u zgjedhur kryetar i Kuvendit”, tha kryesuesi i seancës, Avni Dehari, i cili më pas ndërpreu seancën.
Ndryshe nga herët e kaluara, ku kandidaturat propozoheshin nga nënkryetari i VV-së, Glauk Konjufca, këtë herë Murati u propozua nga deputetja Donika Gërvalla – e cila vetë kishte dështuar të zgjidhej në seancën e së mërkurës.
Vetëvendosje e bëri këtë propozim ndonëse ishte e qartë se partitë e tjera nuk do ta mbështesnin, meqë tashmë ishin deklaruar se nuk votojnë asnjë kandidat që ka qenë pjesë e ekzekutivit.
Seanca e radhës është caktuar për të dielën, më 24 gusht 2025, në orën 11:00.
Pas dështimit të sotëm, kryetari i VV-së, Albin Kurti, u pyet nga gazetarët se kë do ta propozojë partia për kryeparlamentar në seancën e ardhshme.
“E merrni vesh të dielën”, u përgjigj ai, duke qeshur.
Sipas Aktgjykimit të Gjykatës Kushtetuese, një kandidat mund të hidhet në votim vetëm tri herë, çka e vë VV-në përballë presionit për të gjetur një emër konsensual në ditët në vijim.
