Dështimi për të 14-tën herë i konstituimit të Kuvendit të Kosovës, ka bërë që presidentja Vjosa Osmani të reagoi rreth kësaj situate.
Bekim Kupina, këshilltar i presidentes Osmani, për Tëvë1 ka thënë se Osmani tashmë ka ftuar në një takim konsultativ liderët e partive kryesore në vend.
Presidentja ka propozuar që takimi të mbahet më 15 maj.
Ky takim vjen pas shprehjes së gatishmërisë së Presidentes Osmani për të pritur liderët e të gjitha partive politike në një takim gjithëpërfshirës, nëse ata e konsiderojnë të nevojshëm një angazhim të tillë.
“Presidentja Osmani do të fillojë një seri konsultimesh rreth çështjes së konstituimit të Kuvendit nga data 15 maj. Ftesat tashmë janë dërguar për takimet e para dhe po presim konfirmimet”, kështu njofton Bekim Kupina, këshilltar i presidentes Osmani.
Osmani kishte shprehur gatishmërinë për t’i takuar krerët e partive “nëse ata e konsiderojnë të nevojshëm një angazhim të tillë”.
“Presidentja e Republikës së Kosovës, Vjosa Osmani, tashmë ka shprehë gatishmërinë e plotë, që nga data 16 prill, që t’i presë liderët e partive politike në rast se ata e shohin të nevojshme një gjë të tillë. Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”, kishte thënë Bekim Kupina, këshilltar i presidentes Osmani.
