Një nga dëshmitarët e fundit të mbrojtjes së ish-krerëve të UÇK-së në Hagë, do të jetë ish-gjenerali i NATO-s në luftën e fundit në Kosovë Wesley Clark.
Procesi gjyqësor i cili që prej disa vitesh po vazhdon, sipas avokatit Shkëlzen Sopjani, ende nuk ka paraqitur dëshmi bindëse nga ana e Prokurorisë.
Sopjani thekson se dëshmitë e ofruara deri më tani janë kryesisht rrethanore dhe nuk kanë fuqinë provuese për të shpallur dikë fajtor apo të pafajshëm.
Në anën tjetër, avokati vlerëson lartë dëshmitë e mbrojtjes, duke theksuar veçanërisht rolin e dëshmitarëve që kanë qenë pjesë direkte e zhvillimeve në terren gjatë periudhës përkatëse.
Ai përmendi me theks të veçantë dëshminë e Wesley Clark, ish-komandantit të përgjithshëm të NATO-s, i cili ka pasur, siç tha Sopjani, “informata të dorës së parë dhe kontakte të drejtpërdrejta me akterët në terren”.
Sipas tij, dëshmi të tilla janë thelbësore për të ndriçuar realitetin e ngjarjeve dhe për të ofruar një pasqyrë më të qartë të së vërtetës në procesin që po zhvillohet.
“Procesin e deritanishëm në Gjykatë që tash e disa vite po vazhdon dhe dëshmitë që janë bërë nga ana e Prokurorisë, e kemi parë që dëshmitë nga ana e Prokurorisë janë kryesisht dëshmi rrethanore, nuk janë konkrete, pra nuk e kanë atë fuqi provuese për me e shpall dikë fajtor apo jo, sa i përket dëshmisë së mbrojtjes ose dëshmitarëve të mbrojtjes, deri sot kemi parë akterë që kanë qenë të përfshirë drejtpërdrejt në zhvillimet dhe gjithçka që ka ndodhë në kohën për të cilën po flasim me theks të veçantë për Uesley Clark i cili ka qenë edhe komandat i përgjithshëm i NATO-s në atë kohë, pra ka qenë një person që ka pasur informata të dorës së parë dhe shkëbime të dorës së parë me akterë në teren”, deklaroi Sopjani në emisionin “Ditari” në Tëvë1./teve1.info/
