Komisionerja për Informim dhe Privatësi, Krenare Sogojeva-Dermaku, ka thënë se qytetarët nuk e dinë rrezikun që iu vjen nga shkelja e privatësisë së tyre nga kontrollues të ndryshëm.
Sipas saj qytetarët duhet të tregohen të kujdesshëm ku po i japin të dhënat personale, pasi siç ka thënë ‘në epokën digjitale vjedhja e identitetit është vjedhja e jetës së njeriut’.
“E para nuk e dinë qytetarët rrezikun që iu vjen nga shkelja e privatësisë së tyre, mbledhja e të dhënave personale nga kontrollues të ndryshëm do të thotë nga biznese të ndryshme, aplikacione të ndryshme dërgon deri te identifikimi i personit, dërgon deri te vjedhja e identitetit. Në epokën digjitale vjedhja e identitetit është vjedhja e jetës së njeriut prandaj është shumë e rëndësishme që ne ta mbrojmë identitetin tonë, ti mbrojmë të dhënat tona përmes të cilave ne identifikohemi”, ka deklaruar ajo në emisionin “Ditari”, në Tëvë1.
Sogojeva-Dermaku ka shtuar se Agjensia për Informim dhe Privatësi në janarin e vitit të ardhshëm do të lansojë një platformë përmes së cilës do t’i shohin në kohë reale se ku po shkojnë të dhënat e qytetarëve.
“Ajo që është premtuese është fakti që në janarin e vitit të ardhshëm ne do ta lansojmë një platformë të mbështetur nga ambasada amerikane që në kohë reale, në 24 orë do të na tregojë rrjedhjen e të dhënave të qytetarëve tonë në të gjithë ofruesit e shërbimeve të internetit në Kosovë, pra ne në kohë reale do ti shohim se ku po shkojnë të dhënat e qytetarëve nga cili kontrollues po rrjedhin këto të dhëna dhe normalisht do t[ë ndërmarrim veprimet tona sipas legjislacionit në fuqi”, ka thënë Sogojeva-Dermaku./teve1.info/
