Qytetarët thonë se pavarësisht çmimit të ngritur janë të detyruar të blejnë dru, pasi që sipas tyre me paralajmërimet për mungesë të rrymës opsion i vetëm është ngrohja me dru.
Gani Fejza, i cili kishte dalë për të blerë dru tha që çmimi i druve për metër kub është i papërballueshëm duke shtuar se vitin e kaluar për një metër dru ka paguar 30 euro.
“Kam ardhur me i marr do dru për dimër, çmimi është shumë i shtrenjtë, i pa përballueshëm, 70, 75 deri në 80 euro shkon çmimi. Vitin e kaluar e kemi paguar 30 deri 35 më së shumti.
Nuk e di qysh ia dalim, rrymë po thonë s’ka me pas, problem për besë. Qymyri është i ndaluar, pos me dru”, shton Fejza.
Ramadan Kameri, tha se formë tjetër të ngrohjes nuk ka, ndërsa për shkak të shtrenjtimit të rrymës është i detyruar të blejë dru.
“Ende nuk kemi ble por çmimi është rrit shumë, është dyfishuar nga viti i kaluar. Por ka edhe mungesë të druve sepse vetëm Gollaku është me mal edhe malet janë pre shumë këtë vit.
Duhet me ble por janë shtrenjtuar shumë, tepër shumë, 70 deri në 80 euro. Ky çmim nuk është i përballueshëm por me gjendjen në Kosovë tash s’kem çka bëjmë duhet me i marr diqysh.
Formë tjetër të ngrohjes nuk kemi, se rryma shtrenjt duhet me dru tjetër rrugëdalje nuk ka”, tha Kameri.
Bedri Ismaili tha se çmimet janë duke shkuar nga 80 deri në 100 euro për një metër dru, duke shtuar se ky çmim është i papërballueshëm, marrë parasysh faktin që është i papunë.
“Prej 80 deri në 100 euro po shkon një metër dru, ne nuk kemi ka me marr punëtor krahu, pa punë. Çmimet janë rritur si në dru si krejt, tjetër mundësi ngrohje nuk kemi veç dru me ble.
80 deri 100 euro po shkon një metër dru në nuk mundemi me përballu sepse nuk i kemi kushtet pa puna jemi, gjithë ditën në rrugë. Vitin e kaluar ka qenë më lirë nga 65 euro, 55 e 40 euro”, tha Ismaili./EO/
