Një incident verbal ka ndodhur në një lokal në Prishtinë, ku një qytetar është përballur me deputeten e Lëvizjes Vetëvendosje, Fitore Pacolli, duke e akuzuar për korrupsion dhe duke e quajtur “hajne”.
Sipas pamjeve të publikuara në rrjete sociale, qytetari i është afruar tavolinës ku po qëndronte deputetja Pacolli dhe i ka ofruar të paguajë faturën e saj, duke i thënë se “duhet t’i vijë marre që po e vjedh Kosovën”.
“A të kujtohet kur i thojshë hajna? I ke ba miliardat”, dëgjohet të thotë qytetari gjatë konfrontimit verbal.
Deputetja Pacolli shihet në video duke ia hedhur faturën qytetarit dhe duke u ngritur në këmbë, teksa reagon ndaj akuzave.
“Unë nuk tu tutna. Nuk guxon të më prekesh”, i thotë ajo qytetarit në video.
Burime të afërta të Tëvë1 bëjnë të ditur se pas incidentit, qytetari është ndaluar nga Policia e Kosovës për shkak të sjelljes së tij dhe tensioneve të shkaktuara në vendin e ngjarjes.
Ende nuk ka ndonjë reagim zyrtar nga deputetja Pacolli apo nga Lëvizja Vetëvendosje lidhur me rastin. Po ashtu, Policia nuk ka dhënë ende detaje mbi arrestimin apo veprimet e mëtejshme ndaj qytetarit.
