Deputetja e Lëvizjes Vetëvendosje, Arbëreshë Kryeziu-Hyseni duke folur për draft-statutin e Asociacionit hartuar nga Fondacioni Friedrich Ebert Stiftung, ka thënë se lë hapësirë për të dyshuar se a është bazë e mirë apo jo.
Sipas saj drafti bazohet në marrëveshjen e vitit 2013 të cilën Serbia e ka shkelur.
“Drafti bazohet në marrëveshjen e 2013 e cila në fakt nuk është ratifikuar asnjëherë në Kuvendin e Serbisë. Po ashtu bazohet në një marrëveshje e cila në dhjetor 2022 është shkelur nga Serbia, kur i kanë dërguar letër shteteve mosnjohëse për të mos e pranuar aplikimin tonë ëpr dorëzim në BE”, ka thënë ajo në Këndin e Debatit në Tëvë 1.
Tutje ajo ka thënë që është problem nëse thuhet se Asociacioni duhet të themelohet.
“Ne e shohim problematike gjithçka që ndërlidhet me Asociacionin sot. Gjithçka që çon tek ajo që Asociacioni duhet të themelohet krijon një problem në vete i cili duket të jetë problem shumë më i madh sesa që shihet në sipërfaqe. Pavarësisht a është draft prej FES-it apo ndonjë organizate, kur jemi tek ajo se duhet themeluar asociacion kjo është problem, sepse ne jemi kundër”, ka shtuar Kryeziu-Hyseni.
Për këtë arsye ka thënë se nuk janë marrë fare me atë draft.
“Ne absolutisht nuk jemi marrë me atë që ka nxjerrë FES-i pikërisht për këtë arsye. Mendojmë se as nuk duhet të ulemi dhe të diskutojmë rreth asaj se si do të duhej të dukej Asociacioni bazuar në marrëveshjen në parim të 2013 apo tjetrës të 2015”, ka shtuar ajo.
