Deputetja e vetme shqiptare në Parlamentin e Kroacisë, Ermina Lekaj, tha se që nga hyrja e saj në parlamentin kroat, janë ndërtuar tetë shtëpi të kulturës, raporton teve1.info
Në një intervistë për Tëvë1, me rastin e Pavarësisë së Kosovës, Lekaj tha se qëllimi i saj ka qenë që në çdo prefekturë të ketë nga një shtëpi të kulturës për shqiptarë, derisa shtoi se me hapjen e shtëpisë së tetë të kulturës, është përmbyllur edhe ky cikël i hapjes së këtyre objekteve.
“Sot shqiptarët e kësaj prefekture janë duke i bërë dy festa hapjen e kësaj prefekture dhe shpalljen e Pavarësisë së Kosovës e cila do ta përfshijë krejt këtë prefekturë dhe besoj që së shpejti do të mbushet me të rinj shqiptarë që do të kenë aktivitete të ndryshme në këtë shtëpi. Me ardhjen time në parlamentin kroat kam një marrëveshje me qeverinë kroate ku kam mundësi të marr fonde për komunitetin shqiptar, vizioni im ka qenë që në çdo prefekturë shqiptarët të kenë nga një shtëpi të kulturës, kjo është shtëpia e tetë e kulturës dhe mendoj që me këtë ta përfundojmë këtë cikël të hapjes së këtyre objekteve dhe pastaj do të vazhdojmë me projekte tjera që mendoj se janë shumë të rëndësishme, shembull në fusha të sportit bashkë me qeverisjet lokale ku jetojnë shqiptarët”, tha Lekaj.
Sipas saj, pas këtij cikli do të vazhdohet edhe me hapjen e mësimit plotësues në gjuhën shqipe.
“Është e rëndësishme sepse me përfundimin e këtij cikli vazhdojmë me cikle tjera dhe bashkatdhetarëve u jep vullnet që të punojnë më shumë. Me ardhjen time në vitin 2015 në një vizitë tek bashkatdhetarët, vendosën që ta riaktivizojnë bashkësinë dhe vazhduan të merren me aktivitete shumë të rëndësishme, hapën edhe mësimin plotësues në gjuhën shqipe, besoj se do ta hapim edhe në dy shkolla tjera, për momentin e kanë vetëm në një shkollë, dhe vazhduan të organizojnë manifestim të ndryshme, tribina të ndryshme, aktivitete të ndryshme që janë shumë të rëndësishme jo vetëm për komunitetin tonë por edhe qytetarët e kësaj prefekture. Ajo çka është më e rëndësishme shqiptarët këtu kanë raporte shumë të mira mes vete, shqiptarët që jetojnë këtu janë shumë punëtor, ndërmarrës të mirë dhe me punën e tyre i ndihmojnë edhe zhvillimit të bizneseve”, tha ajo.
