Deputetja e Lëvizjes Vetëvendosje, Fatmire Mulhaxha – Kollçaku, ka thënë se çështja e mandatarit të dytë për kryeministër, pas dështimit që të votohet Qeveria Kurti III të dielën është në diskrecionin e presidentes.
Ajo nuk ka dhënë përgjigje konkrete nëse do të synojnë përsëri që ta formojnë qeverinë, por ka thënë se LVV nuk ka kandidat tjetër për kryeministër pos Albin Kurtit.
“Të gjithë e dimë epilogun e seancës së fundit dhe procedurat në bazë të Kushtetutës dhe ligjeve. Tani është në diskercionin e presidentes që ajo t’i ftojë subjektet politike, kur për dallim në rastin e parë, natyrshëm i kalon e drejta subjektit fitues që ta propozojë mandatarin, herën e dytë është në diskrecioin e presidentes që t’ia kalojë subjektit të para apo të tjerave, varësisht se cilat i kanë nëmurat. Ajo çfarë mund t’ju thamë se për këtë herë mandatari i vetëm nga LVV-ja është Albin Kurti”, tha Mulhaxha – Kollçaku, në emisionin “Këndi i Debatit” në Tëvë1.
Ajo ka thënë se brengë për ta në këto momente është miratimi i buxhetit për vitin e ardhshëm.
Gjatë ditës është raportuar në media se LVV po synon edhe një seancë për votimin e Qeverisë Kurti III.
Megjithatë njohës të çështjeve kushtetuese kanë vlerësuar se Kurti nuk mund të mandatohet përsëri, pas dështimit për të marrë besimin në seancën e së dielës.
