Departamenti i Shtetit ka dyfishuar numrin e fluturimeve emergjente për evakuimin e qytetarëve amerikanë që dëshirojnë të largohen nga Izraeli.
Ai poashtu ka urdhëruar largimin e stafit jo-thelbësor nga Ambasada Amerikane në Liban dhe ka shtuar paralajmërimet për udhëtime në Lindjen e Mesme, për shkak të shqetësimeve për hakmarrje të mundshme iraniane pas sulmeve amerikane mbi objektet bërthamore të Iranit gjatë fundjavës.
AP ka raportuar se, të dielën, Departamenti i Shtetit publikoi një alarm të përgjithshëm, duke u bërë thirrje të gjithë qytetarëve amerikanë jashtë vendit të jenë të kujdesshëm.
“Konflikti midis Izraelit dhe Iranit ka shkaktuar ndërprerje të udhëtimit dhe mbyllje periodike të hapësirës ajrore në rajon,” thuhej në njoftim. “Ekziston rreziku për protesta dhe veprime kundër interesave amerikane në vende të ndryshme.”
Në një deklaratë tjetër të së dielës, Departamenti njoftoi se kishte urdhëruar largimin e stafit jo-thelbësor dhe familjeve të tyre nga Ambasada Amerikane në Bejrut, për shkak të gjendjes së paqëndrueshme dhe të paparashikueshme të sigurisë në Liban.
Ndërkohë, nuk u përmendën plane për evakuim të organizuar për qytetarët amerikanë privatë në Liban, të cilëve iu rekomandua të përdorin fluturime komerciale.
Njëkohësisht, SHBA ka lëshuar paralajmërime sigurie për qytetarët e saj në Arabinë Saudite dhe Turqi. Në Arabinë Saudite, personelit diplomatik u është kërkuar të kufizojnë udhëtimet jo-thelbësore, veçanërisht në afërsi të bazave ushtarake.
Ndërsa në Turqi, personeli amerikan është udhëzuar të mbajë profil të ulët dhe të shmangë udhëtimet personale në Konsullatën e SHBA-së në Adana, ku ndodhet edhe baza ajrore e NATO-s në Incirlik.
