Viti 2023 kishte nisur tragjikisht për lokalin “Kobra City”.
Shkak i një fature, ky lokal u bë skenë krimi. Aty u vra një person, shtetas i Shqipërisë.
Për këtë vrasje, i akuzuar kryesor është pronari i lokalit, Dibran Hoxha.
I njohur si “Kobra”, pas një gjykimi gati një vjeçar, Gjykata Themelore i shpalli fajtor, Hoxhën bashkë me katër të akuzuarit e tjerë.
“Të akuzuarin Dibran Hoxha, për veprën penale “vrasje e rëndë” i cakton dënim me burgim në kohëzgjatje prej 23 viteve, si dhe për veprën penale “mbajtje në pronësi, posedim, kontroll të paautorizuar të armëve” dënim me burgim në kohëzgjatje prej dy vitesh. Të njëjtin e gjykon me dënim unik në kohëzgjatje prej 24 viteve”, u shpreh Kujtim Krasniqi, kryetar i Trupit Gjykues.
Me burgim prej 7 vitesh për disa vepra penale, u dënua i akuzuari tjetër, Roland Susuri.
“Të akuzuarit Roland Susuri për veprën penale “Manipulim me prova” i përcakton dënim me burgim prej 4 vite e gjashtë muaj, për veprën penale “pjesëmarrje në rrahje” një vit e gjashtë muaj, për veprën penale “Mbajtje në pronësi, kontroll ose posedim të paautorizuar të armëve” një vit e gjashtë muaj. Të njëjtin e gjykon me dënim unik në kohëzgjatje prej 7 vitesh”, tha Krasniqi.
Susurit, nga e enjta Gjykata ia caktoi edhe masën e paraburgimit.
Të bashkëakuzuar me Hoxhën dhe Susurin, ishin edhe tre persona të tjerë, të cilët po ashtu u shpallën fajtor.
Jesmir Badalli, u dënua me dy vite burghim, për pjesëmarrje në rrahje dhe armëmbajtje pa leje.
Kurse, për veprën penale “manipulim me prova” me nga një vit secili, u dënuan edhe Arben Vezaj dhe Burim Mazreku.
Të pakënaqur me vendimin e shkallës së parë, shprehet Vezaj bashkë me mbrojtjen e tij.
“Tri herë e kam thirrë policinë para se me ndodhë rasti, veç që i kam pa tu shty kamarierin me shtetasit shqiptarë të Shqipërisë. Edhe shtatë muaj kam qenë në burg, tash prapë më dënuan. Kjo është e padrejtë”, tha i akzuari Arben Vezaj.
“Në ditën kritike në “Kobra City”, është i vetmi që ka thirru policinë tri herë. Është edhe numri i regjistruar që e ka thirrë policinë, dhe sot dënohet. Ky është absurditet i madh. Shpresojmë në Gjykatën e Apelit, që këtë çështje do e kthejë në rivendosje”, u shpreh Blend Gjini – avokat i Vezajt.
Në shpalljen e aktgjykimit, mungoi i akuzuari kryesor Dibran Hoxha.
