Për t’i dhënë një pamje të re, muret xhamisë në Ferizaj janë duke u renovuar.
Mirëpo, këtë mundësi, disa persona e shfrytëzuan për të kryer vjedhje brenda objektit.
Imami i xhamisë thotë se akti u krye në kohën kur xhamia është pa energji elektrike.
E kjo xhami, cak i vjedhjes, sipas imamit ishte dy herë brenda dy ditëve.
Dëmi i shkaktuar konsiderohet të jetë rreth 13 mijë euro.
“Xhamia e madhe nga data 27, nga e hëna është në renovim nga Ministria e Kulturës, Qeveria e Republikës së Kosovës dhe te enjtën në mbrëmje, por edhe mbrëmë kanë ndodhur disa vjedhje, janë marrë pompat termike që kanë qenë të vendosura këtu te kjo pjesa që është monument historik, pompat termike kanë qenë në vlerë 12mijë e 600 qind euro, e të enjtën është thy zyrja e imamit ku është marrë zërimi e disa gjëra të tjera, këpucë e dokumente çfarë kanë qenë aty”, deklaroi imami i xhamisë, Mustaf Ahmeti.
Imami Ahmeti shtoi se një rast i tillë nuk është raportuar më herët.
“Gjatë renovimit është bërë një shfrytëzim i rastit sepse në të kaluarën nuk ka pas diçka vjedhje të tilla se kanë qenë edhe kamerat e xhamisë aktive, mirëpo tani për shkak të renovimit që janë duke e bërë në pjesën e përparme të xhamisë nuk kemi më, edhe rryma është ndërprerë dhe e kanë shfrytëzu rastin dhe ka ndodh ajo çfarë ka ndodh. Ne si Këshill i xhamisë së madhe dhe i Bashkësisë Islame në Ferizaj e kemi njoftu edhe Policinë për atë se çfarë ka ndodhur”, tha ai.
Rastin e kanë konfirmuar edhe nga Policia e Kosovës.
Të njëjtit kanë bërë të ditur se hetimet janë duke vazhduar.
“Ankuesi mashkull kosovar ka informuar se persona të panjohur, nga xhamia kanë vjedhur zmadhuese të zërit, 15 palë këpucë, disa dokumente dhe sistemin e pompave termike. Rasti është duke u hetuar”, thuhet nga Policia e Kosovës.
Imami i kësaj xhamie shpreson se rasti do të zbardhet shumë shpejt pasi siç thotë ai, vendi është i rrethuar me kamera nga të gjitha anët.
Kronikë e realizuar nga gazetarja, Jona Kelmendi.
