Prokuroria Themelore në Prizren ka paraqitur kërkesë për caktimin e masës së paraburgimit njëmujor ndaj katër personave nga gjithsej 39 të arrestuarit në kuadër të hetimeve për dyshime për keqpërdorime financiare në Byronë Kosovare të Sigurimit (BKS).
Sipas kërkesës së Prokurorisë, masa e paraburgimit është kërkuar ndaj ish-drejtorit të BKS-së, Sami Mazreku, ish-drejtorit të Financave, Valon Berisha, si dhe ndaj dy personave të tjerë të identifikuar me inicialet F.S. dhe Y.Ç.
Për 35 të dyshuarit e tjerë, Prokuroria ka propozuar masa alternative, përfshirë obligimin për paraqitje të rregullt në stacion policor dhe ndalimin e afrimit në vende apo ndaj personave të caktuar.
Sipas dosjes hetimore, Mazreku dhe Berisha dyshohen se gjatë periudhës korrik 2022 – tetor 2023 kanë realizuar qindra transaksione financiare nga llogaritë e BKS-së, duke i paraqitur ato si pagesa për kompensim të dëmeve nga aksidentet e trafikut. Hetimet tregojnë se këto pagesa janë miratuar për persona që, në fakt, ishin kompensuar më herët për të njëjtat raste.
Transaksionet e dyshuara variojnë nga 6 mijë e 800 euro deri në 68 mijë euro për secilën pagesë, ndërsa dëmi i shkaktuar Byrosë Kosovare të Sigurimit vlerësohet të jetë mbi një milion euro.
Prokuroria vlerëson se të dyshuarit kanë vepruar në kundërshtim me rregulloret e brendshme të institucionit, duke keqpërdorur autorizimet zyrtare për përfitime personale. Ata përballen me dyshime për veprat penale “keqpërdorim të besimit”, “keqpërdorim të autorizimeve ekonomike në bashkëkryerje”, ndërsa ndaj Berishës dhe disa personave të tjerë rëndon edhe dyshimi për falsifikim të dokumenteve.
Pjesa më e madhe e të dyshuarve të tjerë hetohen për përfshirje në falsifikimin e dokumenteve.
Ndërkohë, seanca dëgjimore për caktimin e masave të sigurisë është ende në zhvillim.
