Analisti, Arton Demhasaj, thotë se pozita e përfaqësimit të shqiptarëve në Maqedoninë e Veriut ka filluar të rritet.
Demhasaj thotë se Talat Xhaferi i cili është kandidat për tu zgjedhur kryeministër i qeverisë teknike, është një njeri i dëshmuar, që sipas tij ka treguar paanshmëri në pozitën e kryetarit të Kuvendit për dy mandate radhazi.
“Talat Xhaferi, një njeri i dëshmuar – dy herë kryetarë Kuvendi i Maqedonisë së Veriut që e ka dëshmuar që e ka udhëhequr pozitën e tij me paanshmëri të plotë dhe ka qenë shumë mirë në pozitën e tij që e ka mbajt. Kjo tregon së pari që pozita e përfaqësimit të shqiptarëve në Maqedoninë e Veriut ka fillua me u ngritë. Nëse kthehemi 10 vite mbrapa ose edhe më shumë 20 vite e shohim se ku kanë qenë shqiptarët edhe përkundër që kanë pasur një përqindje tepër të lartë të popullsisë dhe ku janë sot tregon që veç është duke u rritur përfaqësimi i shqiptarëve në strukturat më të larta që shtetit maqedon. Në fillim ka qenë edhe e paimagjinueshme që edhe kryetari me qenë shqiptar edhe aq ma pak kryeministër”, tha ai në emisionin “Këndi i Debatit” në Tëvë1.
Analisti thotë se është mirë që Xhaferi të jetë kryeministër shqiptar gjatë procesit të mbajtjes së zgjedhjeve, por sipas tij do ketë edhe pasoja.
“Mendoj që është shumë me rëndësi që me qenë kryeministri shqiptar gjatë procesit të mbajtjes së zgjedhjeve, sepse ne e kemi parë që ka pasur telashe në të kaluarën edhe me listat e votuesve atje, sepse shumë shqiptarë që kanë marrë nënshtetësinë e vendeve të tjera në perëndim, kanë pasur telashe me ardhë me votu dhe kjo ka ndikuar që të zvogëlohet numri i shqiptarëve atje. Kjo normalisht që ka edhe pasoja. Ka pasoja te fushata zgjedhore që ka me u mbajt. Duke marrë parasysh që LSDM-ja bashkë me BDI-në janë në pushtet, dhe duke marrë parasysh që LDSM-ja është ajo që ka pranuar një marrëveshje që për 100 ditë kryeministri me qenë shqiptar e që kjo marrëveshje po mbahet e po respektohet nënkupton që mund të vazhdojë partneriteti politik mes LDSM-së dhe BDI-së”, deklaroi ai.
Demhasaj thotë se partia e parë mund të dalë VMRO-ja, sepse ka anshmëri nacionaliste, dhe sipas tij, do ta përdorë zgjedhjen e Xhaferit kryeministër për ta rritur edhe më shumë nacionalizmin në Maqedoninë Veriore.
“Mundet me pas pasoja se pastaj mund të dalë e para VRMO-ja, sepse është me bazë nacionaliste dhe mendoj që ka me përdorë pikërisht këtë që me e rritë hala më shumë tendencën e nacionalizmit në Maqedoninë e Veriut për me votu VRMO-në dhe jo LSDM, sepse ka me përdor këtë kartë në publik”, shtoi ai.
Talat Xhaferi pak orë më parë ka bërë të ditur se ka dhënë dorëheqje nga pozita e kryetarit të Kuvendit të Maqedonisë së Veriut, kështu duke u përgatitur për kryeministër.
Dorëheqja e tij vjen si rezultat i marrëveshjes politike të bërë në Maqedoninë e Veriut, dhe pritet që Xhaferi të vazhdojë angazhimin e tij politik si kryeministër teknik deri në zgjedhjet e reja. Ai pritet që më 28 janar të emërohet kryeministër nga radhët e BDI-së.
Kjo do të jetë hera e parë në historinë politike të Maqedonisë së Veriut që kryeministër do të jetë një shqiptar.
Zgjedhjet parlamentare në Maqedoninë e Veriut do të mbahen më 8 maj 2024./teve1.info/
