Analisti, Arton Demhasaj ka komentuar nenin e 7 të propozimit evropian i cili flet për sigurimin e “një niveli të duhur të vetëmenaxhimit për komunitetin serb në Kosovë dhe aftësinë për ofrimin e shërbimeve në fusha specifike, duke përfshirë mundësinë e mbështetjes financiare nga Serbia dhe një kanal të drejtpërdrejtë komunikimi për komunitetin serb me Qeverinë e Kosovës”.
Demhasaj ka thënë se kjo pikë tregon që nuk do të ketë më Asociacion, por një nivel autonomie për serbët në Kosovë.
“Dokumenti po thotë një nivel të duhur të vetmenaxhimit. Thjesht kjo nuk është më Asociacion, kjo është autonomi. Dmth ti merre lexoje terminologjinë e autonomisë, kjo është taman autonomi ku serbëve kjo marrëveshje iu jep autonomi të vetmenaxhimit. Pra kalohen këto rregullativa të tanishme që i kemi, sepse serbët janë me një komunë ku është Ligji për Vetqeverisje lokale që ia përcakton kompetencat që i kanë komunat sikur që i kanë krejt komunat tjera në Kosovë dhe tash me këtë marrëveshje ajo bjen poshtë. Ti serbëve po ua ofron një autonomi të vetmenaxhimit të tyre, madje thuhet specifikisht serbët. Këtë s’kanë me guxu as me e çu në Gjykatë, gjasat me rrëzu ata janë zero”, ka deklaruar Demhasaj në Këndin e Debatit në Tëvë 1.
Sipas tij kjo pikë është më e keqe sesa marrëveshja e vitit 2015 për Asociacionin pasi që me këtë, serbët po dallohen nga komunitetet tjera dhe tash nuk po flitet për komunat me shumicë serbe por ekskluzivisht për serbët.
“Mendimi im është që kjo pikë, kjo pjesë është më e keqe se sa që e kanë pasë marrëveshjet e kalume. Ma e keqe dhe ma e vështirë sesa marrëveshja e 2015. Në të kaluarën marrëveshja e 2015 ka thënë Asociacion i Komunave me Shumicë Serbe, tashmë s’po flet për Asociacion, por po flet për nivel të vetmenaxhimit të serbëve, pra, nga ajo tendenca që Asociacioni ka bazë etnike por nuk është njetnik, tash po kalojmë drejt asaj që po kërkohet një vetmenaxhim. Flet për serb, nuk flet më për komunat me shumicë serbe por ekskluzivisht për serbët. Dhe kjo ia humb barazinë në Kushtetutën tonë sepse tash komunitetet tjera që i kemi ata janë anash kanë një trajtim ndryshe dhe serbët kanë një trajtim ndryshe”, ka shtuar Demhasaj.