Demhasaj tha se nuk mund të thuhet se Qeveria ka arrestuar kaq persona, sepse atë punë e bën policia, prokuroria e gjykata që e jep edhe vulën finale.
“Për shumë raste shembull si ai i bujqësisë, ose i Brezovicës, prokuroria ka bërë të ditur që këto raste kanë qenë në hetim me vite, pra që nuk lidhen as me kohën që kemi tash qeverinë Kurti 1, pra ato janë puro kompetenca që i ka policia dhe që nuk lidhen me kompetencat ekzekutive të qeverisë. Lufta e korrupsionit është luftë që i takon sistemit të drejtësisë, pra Kushtetuta jonë i ka pushtetet e ndara nuk ka përzierje dhe për këtë çështje ne duhet të duartrokasim reagimin e policisë, reagimin e prokurorisë dhe të gjykatave. Atë çka mundet me thënë qeveria Kurti mendoj që mundet me thënë që: Ne jemi në qeveri nuk kemi pasë tendenca me ndiku te sistemi i drejtësisë qysh kanë ndiku qeveritë e tjera që nuk është e matshme por megjithatë është një lloj argumenti, por jo me thënë që qeveria po e lufton korrupsionin sepse sipas meje nuk ka kompetenca, sepse ajo çka ka qeveria kompetenca është miratimi i politikave të caktuara, të cilat pastaj e drejtojnë prokurorinë, policinë, apo gjykatat se si me vepru”, tha Demhasaj në tëvë1.
Analisti Artan Demhasaj më tej ka thënë se ai është dakord që nuk duhet të lejohet mbajtja e zgjedhjeve serbe në Kosovë sepse sipas tij kjo është e drejtë e Kosovës si një shtet sovran.
“Arsyetimi i kryeministrit Kurti për moslejimin e mbajtjes së zgjedhjeve serbe në Kosovë ka qenë se ne nuk do të lejojmë që të shkelet sovraniteti, kurse sa i përket vendimit të Qeverisë për refuzimin e QUINT-it, a është vendim i drejtë apo nuk është unë mendoj se ne nuk mund të themi asgjë sepse ne nuk po e dimë çka ka refuzuar QUINT-i, dhe në anën tjetër ne nuk e dimë as propozimin e QUINT-it ndaj qeverisë sonë”, tha Demhasaj në tëvë1.
