Kryeministri Edi Rama siguroi të gjithë qytetarët se ata që kanë pësuar dëme nga zjarri do të përfitojnë mbështetje të plotë dhe dëmshpërblime sipas protokolleve të caktuara.
Rama tha se deri më tani janë prekur 207 shtëpi nga zjarri, nga të cilat 40 prej tyre janë shkrumbuar totalisht.
Kryeministri tha se procesi i inventarizimit të dëmeve është në vazhdim, ndërsa siguroi qytetarët që kanë humbur banesat se do të t’u ndërtohen të reja.
Gjithashtu, shtoi Rama, do të ketë kompensim për çdo kokë bagëtie të humbur si pasojë e zjarreve.
“72 orët e fundit ishin tepër të vështira për shkak të zjarreve, të cilat pati një zhvillim më të madh se çdo herë tjetër. Dua t’ju shpreh ngushëllimet e mia atyre që humbën të afërmin dhe solidaritetin tim për familjet që kanë humbur shtëpinë nga zjarri. Janë 207 shtëpi të dëmtuara, të prekura nga zjarri, por në këtë numër hyjnë edhe 40 familje të cilat kanë humbur shtëpinë plotësisht. Dua t’ju siguroj të gjithëve se ata që kanë humbur shtëpinë apo kanë pësuar dëmtime nga zjarri, ne po bëjmë inventarizimin e plotë të dëmeve, sipas protokollit të situatës, me autoritetet përkatëse.
Siç ka ndodhur dhe herëve të tjera, askush nuk do të jetë vetëm dhe do ta kenë shtetin dhe qeverinë në krah, për t’u rikthyer në shtëpi më të forta dhe më të sigurta dhe për të marrë dëmshpërblimet përkatëse. Për momentin, numri i krerëve të humbur është 3690, dhe secili prej tyre do të kompensohet siç duhet. Inventarizimi i të dëmtuarve vazhdon. Nga ana tjetër, janë gjithsej 10,249 forca të përfshira në këtë operacion, të cilat kanë punuar sipas protokollit të situatës”, tha Rama.
Rama i është përgjigjur edhe akuzave të liderit të PD-së, Sali Berisha, i cili tha një ditë më parë se kryeministri ka blerë charter personal dhe nuk investon në flotën ajrore kundër zjarreve.
Ai ka hedhur poshtë këto akuza, duke i quajtur ato si “broçkullën e madhe”, dhe ka sqaruar se avioni në fjalë përdoret vetëm për udhëtime zyrtare, jo për udhëtime private.
“Duhet t’i rikthehet pak llogarive, avionët nuk janë një fjalë goje, disa pa mendje ose nga dëshira për ta besuar kanë ngrënë broçkullën e madhe se unë, qeveria paskemi blerë avion për veten. S’ka asnjë avion, avioni i shumëpërfolur i përdorur nga unë vetëm për udhëtime zyrtare, në çdo udhëtim privat unë marr avionët e linjës dhe jam rregullisht bashkë me familjen. Avioni i përdorur për udhëtimet zyrtare nuk i ka kushtuar dhe nuk i kushton shtetit shqiptar më shumë se sa shumatorja e shpenzimeve mesatare të kryera çdo vit nga Kryeministri i Shqipërisë, përfshirë mender jush edhe paraardhësin tim”, tha Rama.
Prej 72 orësh vendi ka kaluar një situatë mjaft problematike me zjarret, ku në shumë qarqe flakët kanë dalë nga kontrolli duke djegur banesa, bagëti, dëmtuar parqe të mbrojtura, shumë banorë janë evakuuar, ndërsa fatkeqësisht edhe një person humbi jetën si pasojë e asfiksisë.
Situata më problematike paraqitet në Gramsh, Delvinë, Tepelenë dhe Poliçan, ku flakët kanë hyrë në zonat e banuara.
Gjatë 24 orëve të fundit në të gjithë vendin, 29 vatra mbeten aktive, ndërsa në terren janë angazhuar 10,249 forca të zjarrfikësve, policisë, bashkive, emergjencave civile dhe Forcave të Armatosura. Gjithashtu në ndihmë kanë ardhur edhe 1 avion canader nga Italia, 2 avionë nga Greqia, 1 canader nga Kroacia, 2 helikopterë nga Hungaria, 1 helikopter nga Çekia, 1 helikopter nga Sllovakia, 2 avionë suedezë dhe 2 Black Hawk nga Emiratet e Bashkuara Arabe.
