Shtëpi të përmbytura nga uji, e rrugë të bllokuara.
Kjo ishte gjendja në komunën e Malishevës pas reshjeve të dendura të shiut ditëve të fundit.
Nga vërshimet u dëmtuan familje të shumta në këtë komunë, por edhe biznese e infrastruktura e kësaj komune.
Por këto dëme, kjo komunë nuk ka buxhet t’i kompensojë vetë, prandaj kërkon ndihmë nga niveli qendror.
“Në rastin konkret kemi të bëjmë më dëme shumë të mëdha të cilat për komunën janë të papërballueshme. Ende nuk i kemi bërë llogaritë se sa është dëmi, kemi filluar me pranimin e kërkesave nga ana e qytetarëve dhe bizneseve që janë dëmtuar dhe pas pranimit të një pjesë të kërkesave, komisioni del në terën dhe fillon me vlerësimin e dëmit. Tani nuk mund të flitet se sa është dëmi, por ajo çfarë dihet është dëmet janë jashtëzakonisht të mëdha qoftë në infrastrukturës, qoftë në ekonomitë familjare”, tha zëdhënësi i Komunës së Malishevës, Artan Paçarizi.
Por mbështetja nga niveli qendror sipas drejtorit të Asociacionit të Komunave të Kosovës po merr kohë të gjatë deri sa po ndodhë.
“Nga bisedat që kam pasur me kryetarët e komunave të prekur nga vërshimet jo vetëm këtë herë por edhe herën e kaluar, ata kanë deklaruar se bizneset por edhe një pjesë e bujqve nuk janë kompensuar për dëmet e shkaktuara gjatë viteve të kaluara. Problemi qëndron te burokracia e cila është e paraparë me legjislacionin në fuqi sa i përket kompensimit të dëmeve”, tha drejtori i AKK-së, Sazan Ibrahimi.
Për këtë ai kërkon formimin e një fondi emergjent.
“Krijimi i fondit emergjent për komunat në raste të dukurive të natyrore, kjo pasi pas vërshimeve në këtë rast, komunat do të kenë të garantuar fonde me të cilat të reagonin menjëherë, sa përket përkrahjes së bizneseve, familjeve. Mirëpo për shkak të burokracive ligjore, kompensimi i dëmeve po bëhet pas viteve të tëra”, tha ai.
Përveç komunës së Malishevës, nga vërshimet së fundmi u preken edhe shumë komuna tjera të rrafshit të Dukagjinit, Mitrovica, Drenas e Skenderaj.
