Musli Krasniqit i ishte dëmtuar banesa e tij te ndërtesa sociale në Prishtinë, ku uji kishte depërtuar brenda hapësirës ku jetonte me familje.
Krejt kjo pasi këtu janë duke u kryer disa punime në heqjen e kulmit të kësaj ndërtese.
E dëmet, Krasniqi thotë se janë ende të dukshme, derisa shton se nuk kanë marrë përgjigje për këtë problem që iu është shkaktuar.
“Sot ke qaj djali i kompanisë, ni avokat e kemi angazhu me një kojshi e bëmë një kërkesë ai kish qenë atje, kish thënë se nuk ka dëme vetëm pak ka pikur… E kem nijet me bë ankesë edhe me dal në gjyq më së mrami me kqyrë mujshin me naj kompensu diçka në mujshim, mos mujshim duhet mi hekë edhe me ja grahë qashtu shtrut më nejt”, është shprehur Krasniqi.
Dëmet shihen ende edhe në apartamentin e veteranit të UÇK-së, Agim Berisha i cili shprehet i shqetësuar më këtë gjendje.
“Dëmet janë në përgjithësi në krejt banesat, në dhoma, sallon, kuzhinë, dëmet janë bukur të mëdha, kryesisht kuzhinën ma kanë dëmtu, teshat krevetat e rinj s’ka as dy javë të reja gati ato veç nuk po vërehen tash për tash që janë të dëmtune por kuzhina është e dëmtune, teshat e fëmijëve edhe shumë gjëra tjera… Unë jam shumë i dëmtuar diku vitin e kaluar mbi 25 mijë euro i kam investuar në të”, është shprehur veterani i UCK-së, Agim Berisha.
Këto punime janë duke u implementuar nga Fondi i Kosovës për Efiçiencë të Energjisë me buxhet 90 për qind nga Bashkimi Evropian dhe 10 për qind nga komunat fituese.
Nga ky Fond kanë njoftuar se ende nuk është bërë vlerësimi i dëmeve dhe se kanë kërkuar nga kompania masa të menjëhershme për parandalimin e dëmeve të mëtejshme.
“Prioriteti i FKEE-së dhe kontraktorit në këtë fazë, ka qenë mbyllja e procesit të konstrukcionit të çatisë, për të parandaluar rrjedhjet e mëtutjeshme të ujit. Meqë kjo është realizuar, tani jemi në komunikim të ngushtë me komunën, kontraktorin dhe përfaqësuesit e banorëve për të organizuar vlerësimin e dëmeve eventuale. Një nga masat në këtë projekt është edhe rinovimi i kulmit, i cili është hequr për të mundësuar izolimin e ri termik sipas standardeve të efiçiencës. Pikërisht në ndërtesën në fjalë, janë evidentuar rrjedhjet e ujit në çati, përpara se të fillohet me zbatimin e projektit. Për këtë posedojmë edhe raportet nga kompania e angazhuar projektuese”, thuhet në grafikën e FKEE-së.
E gjatë ditës, këtu janë parë punëtorë të kësaj kompanie duke punuar në rinovimin e çatisë.
